2023 жылдың 25 тамызынан бастап Өзбекстан мен Қырғызстан үкіметтері арасындағы Азаматтардың өзара келуі мен кетуі туралы келісімге өзгерістер енгізу туралы хаттама күшіне енді. Бұл хаттамаға 2023 жылдың 27 қаңтарында Бішкек қаласында қол қойылған еді.

Өзбекстан СІМ хабарлауынша, екі елдің аумағына кіру, шығу, транзитпен өту, әрекет ету және елде болу үшін сәйкестендіру ID-картаны іс жүзінде қолдану өзара келісім бойынша 2023 жылдың 1 қыркүйегінен бастап сағат 00:00-де басталады.

«Хаттамамен енгізілген түзетулерге сәйкес, екі елдің азаматтары үшін мемлекеттік шекарадан өтудің оңайлатылған бірыңғай тәртібі енгізілді. Атап айтқанда, бұдан былай Өзбекстан мен Қырғызстан азаматтары ID-картамен екі елдің аумағына 60 күнге дейін кіріп, жүріп-тұра және бола алады», - делінген Сыртқы істер министрлігінің хабарламасында.

Сондай-ақ Өзбекстан азаматтары шетелге шығу үшін биометриялық төлқұжаты арқылы Қырғызстанға кіріп-шығып, транзитпен басқа елдерге бара алады.