Давлат божхона қўмитасининг “Тошкент-АЭРО” ихтисослаштирилган божхона комплекси (ИБК) томонидан Ислом Каримов номидаги Тошкент халқаро аэропорти чегара божхона постига пресс-тур ташкил этилди.

Пресс-тур давомида божхона қонунчилигини халқаро стандартларга мувофиқлаштириш ҳамда маҳаллий ва хорижлик фуқароларга қулайликлар яратиш юзасидан амалга оширилаётган чора-тадбирлар билан таништирилди. Шунингдек, мамлакатимизда божхона соҳасини тубдан ислоҳ қилиш, жисмоний шахсларнинг чегара божхона постлари орқали ҳаракатланишларини осонлаштириш йўналишида олиб борилаётган ишлар юзасидан мутахассислар томонидан маълумотлар берилди.  

2018 йил январь ойидан бошлаб халқаро аэропортларда “қизил” ва “яшил” йўлаклар татбиқ этилди. Бу фуқароларнинг божхона кўригидан ўтиш жараёнини хорижий стандартларга мувофиқлаштириш ва соддалаштириш учун хизмат қилмоқда.  

Статистика маълумотларига назар соладиган бўлсак, ушбу тизим жорий этилган вақтдан бошлаб шу  кунга қадар божхона назоратидан ўтган йўловчиларнинг ўртача 96 фоиз “яшил” йўлак орқали харакатланган бўлса, қолган 4 фоиз “қизил” йўлак орқали харакатланган. Бу эса, ўз навбатида юртимизда фуқаролар хамда сайёхлар учун қулайликлар яратиш мақсадида қонун хужжатлари соддалаштирилиши натижасининг яққол белгисидир. 

Ислом Каримов номидаги Тошкент халқаро аэропорти чегара божхона пости фаолиятида яна бир янгиликка қўл урилди. Жорий йилнинг 1 июль санасидан бошлаб аэропорт ҳудудининг учиб кетиш залида “Масофавий божхона назорати - божхоначисиз божхона” тизими ишга туширилди. Янги тизимнинг ишлаш тартиби ва афзалликлари юзасидан иштирокчиларга батафсил маълумотлар тақдим этилди. Журналистлар ушбу тизимнинг қулайликларига оид саволлар билан йўловчиларга мурожаат қилишди. Таъкидлаш жоизки, илк маротаба мазкур тизим Cамарқанд халқаро аэропортида жорий этилган бўлиб, хозирги кунга қадар йўловчилар ушбу тизим қулайликларини ҳис этишга улгуришди.  

Маълумот ўрнида айтиш жоизки, жорий йилнинг ўтган даври мобайнида Ислом Каримов номидаги Тошкент халқаро аэропорти чегара божхона пости орқали 998 та рейсда (Халқаро учиб кетиш – 562та, МДХ учиб кетиш 436та) 154 минг 820 нафар йўловчи (йўловчи божхона декларациясини тўлдирган ҳолда 2554 нафар) пост орқали учиб кетишган. Йўловчи божхона декларациясини тўлдирган ҳолда ҳаракатланган 98 та фуқаро шахсий кўрикдан ўтказилиб, шундан 2 та йўловчида божхона қонун бузилиши холати аниқланган.

Учиб кетиш йўналиши билан ҳаракатланаётган йўловчилар орасида жами 21 та ҳолатда қиймати 1 млрд. 250,6 млн. сўмлик товар моддий бойликлар ноқонуний ҳаракатининг олди олинган бўлиб, ўтган йилнинг мос даврига нисбатан 1,4 баробарга ўсган. Мазкур ҳолатлар юзасидан 1 та жиноий ҳамда 20 та маьмурий ҳуқуқбузарлик ишлари юритилган.

Эндиликда, янги тизим жорий этилганлиги натижасида такрорланувчи текширув ҳаракатларини камайтириш орқали ҳозирда йўловчилар ҳамда уларнинг қўл юклари Авиация хавфсизлиги ходимлари томонидан текширилиб, улар томонидан божхона қонунчилиги бузилиши бўйича шубҳа туғилган тақдирда, юклар божхона органларига қонунчилик нуқтаи назаридан кўриб чиқиш мақсадида тақдим этилмоқда.  

Шаҳноза Маматуропова, ЎзА