Жаҳон фонд бозорларида коронавирус пандемияси таъсирида кузатилаётган ноаниқлик ва тебранишларга қарамай, Ўзсаноатқурилишбанкнинг кредит ноталарга етакчи инвестор сифатида иштирок этган Eaton Vance Management ва унинг аффиллинган фондлари билан салмоқли битимни муваффақиятли амалга оширди, бу эса халқаро инвесторларнинг Ўзбекистон Республикасидаги сифатли қарз олувчиларга қизиқиш мавжудлигидан далолат беради. Ўзсаноатқурилишбанкнинг мавқеи бизнес-модели, молиявий кўрсаткичлари ва барқарорлиги мазкур битимни муваффақиятли амалга оширишга кўмаклашди.

Таъкидлаш жоизки, ушбу келишув мамлакатимиз бозори учун ноанъанавий бўлган қарз инструментларидан фойдаланган ҳолда тизимлаштирилди. Нидерландия Қироллигида ташкил этилган махсус молиявий тузилманинг ўзбек сўмида деноминация қилинган кредит ноталарини хусусий тарзда жойлаштириш воситасида Ўзсаноатқурилишбанкни молиялаштириш амалга оширилди. Жалб қилинган маблағлар мамлакатимизда иқтисодий ўсишни таъминлаш ва иш ўринларини яратишда муҳим аҳамиятга эга бўлган кичик бизнес ва хусусий тадбиркорлик соҳасини молиялаштиришга қаратилади ҳамда банкнинг валюта таваккалчилигини камайтириш имконини беради.

Бу банкнинг халқаро бозорларда қарз инструментларини иккинчи бора жойлаштируви бўлиб, 2019 йил охирида Ўзсаноатқурилишбанк Лондон фонд биржасида 300 миллион АҚШ доллари миқдоридаги илк корпоратив еврооблигацияларини чиқарган эди.

Eaton Vance Management ва унинг аффилланган фондлари (Eaton Vance) бутун дунё бўйича инвесторларга инвестицион стратегиялар ва активларни бошқариш соҳасида илғор ечимларни тақдим этмоқда. 2020 йил 30 апрель ҳолатига кўра, Eaton Vance бошқарувидаги бирлаштирилган (консолидация қилинган) активлари 465,3 млрд. АҚШ долларини ташкил этди.

Catara Consulting Europe кредитни тузилмалаштиришни амалга оширди, White & Case LLP ва Kinstellar эса юридик маслаҳатчи сифатида қатнашди.