“Ўзбеккино” ва “Союзмультфильм” “Хўжа Насриддин саргузаштлари” мультсериалини биргаликда суратга олади
Ўз навбатида, “Союзмультфильм” киностудияси вакиллари ҳам бу ҳамкорликдан мамнун эканини билдирди.
“Ўзбеккино“ миллий агентлиги делегацияси аъзолари Москвага хизмат сафари доирасида “Союзмультфильм“ федераль давлат унитар корхонасига ташриф буюрди. Учрашувда томонлар ҳамкорлик тўғрисида меморандум имзолади. “Ўзбеккино“ ва “Союзмультфильм“ биргаликда Хўжа Насриддин ҳақидаги анимацион сериални яратишга келишиб олди.
–Бугунги кунда миллий анимация санъатини ривожлантиришга жиддий эътибор берилмоқда, – деди “Ўзбеккино“ миллий агентлиги бош директори Ф.Aбдуҳолиқов журналистларга берган интервьюсида. – Биз жажжи томошабинларини ўзига жалб қиладиган миллий мультфильмларни кўпайтиришимиз керак. Яқинда миллий мультиқаҳрамонлар қиёфасини яратиш учун танлов эълон қилдик. Бугун “Союзмультфильм“ билан йўлга қўйилаётган ҳамкорлик ҳам ўз самарасини беришига ишонамиз. Хусусан, янги мультсериал қаҳрамони – Хўжа Насриддин ҳам каттаю кичикнинг қалбидан жой олади, деб умид қиламиз.
Ўз навбатида, “Союзмультфильм” киностудияси вакиллари ҳам бу ҳамкорликдан мамнун эканини билдирди.
– Биз 20 йилдан бери Ўзбекистон билан ҳамкорлик қилиш имкониятини кутиб келамиз. Хўжа Насриддин ҳақидаги анимацион сериални яратиш ғоясини сўзсиз қўллаб-қувватлаймиз. Чунки, бир нечта авлод шу донишманд ва хушчақчақ миллий қаҳрамон ҳақидаги латифалар, афсоналарни эшитиб улғайди, у турли халқларнинг Самарқанд, Бухоро сингари тарихий шаҳарлар ҳақидаги тасаввуридан ўрин олган, – деди “Союзмультфильм“ киностудияси бош директори Борис Машковцев.
Учрашувда Ўзбекистон Республикасининг Россия Федерациясидаги элчихонаси вакиллари ҳам иштирок этди.