Республика қўғирчоқ театрларининг анъанавий XII кўрик-фестивали онлайн тарзда ўтказилди. Кўрик-фестивалда мамлакатимиздаги 10 та қўғирчоқ театри ўзининг энг сара спектакллари билан иштирок этди.

Мазкур тадбир ижодий жамоалар учун ўзаро тажриба алмашиш, ҳамкорликнинг, репертуар ранг-баранглиги устида ишлашнинг нақадар муҳимлигини яна бир бор намойиш этди.

Биринчи ўринга Сурхондарё вилояти қўғирчоқ театрининг “Қодирий кулдирганда” спектакли ҳамда Фарғона вилояти қўғирчоқ театрининг “Тойчоқ” спектакли муносиб топилди. Иккинчи ўринга Қашқадарё вилояти қўғирчоқ театрининг “Қуш тили” спектакли ҳамда Қорақалпоқ давлат қўғирчоқ театрининг “Саҳро Бембийи” спектакли сазовор бўлди. Учинчи ўрин Хоразм вилояти қўғирчоқ театрининг “Қалдирғоч ва майна” спектакли ва Ўзбек миллий қўғирчоқ театрининг “Маша буви ёпган бўғирсоқ” спектаклига насиб этди.

Кўрик-фестивалда, шунингдек, бир қатор номинациялар бўйича ғолиблар тақдирланди.