Украина Президенти Владимир Зеленский АҚШ ва Россия раҳбарлари Дональд Трамп ҳамда Владимир Путин ўртасида Будапештда ўтказилиши режалаштирилаётган музокарада иштирок этишга тайёрлигини маълум қилди. Бу ҳақда у “NBC News” телеканалига берган интервьюсида гапирган.

– Мен тайёрман, буни Президент Трампга Оқ уйдаги учрашувда ҳам айтганман, – деди у. – Адолатли ва барқарор тинчликка фақат ҳар икки томон иштирокидагина эришиш мумкин.

Журналистлар саволига жавобан Зеленский Украина ҳудудининг бир қисмини Россияга бериш орқали урушни тўхтатиш эҳтимолини инкор этди:

– Урушни дипломатия йўли билан тўхтатмоқчи бўлсак, жойимизда туришимиз керак. Путинга қўшимча ҳеч нарса бермаймиз.

Украина раҳбари мамлакат урушда мағлуб эмаслиги, Россия ҳам ғолиб чиқмаганини таъкидлади. Унинг фикрича, Россия фронтдаги муваффақиятсизликни ҳаво ҳужуми билан қопламоқда.

– Путин энергетика инқирози орқали Украина аҳолисини босим остида қолдирмоқчи, – деди Зеленский.

Оқ уй матбуот котиби Кэролайн Левитт айтишича, Вашингтон Будапешт саммитида Зеленский ҳам қатнашишини кутмоқда. Трамп эса 17 октябрь куни Зеленский билан Вашингтонда учрашгач, “у Будапештга бормайди, аммо доимий алоқада бўламиз”, дея таъкидлаган.

Трамп ижтимоий тармоқдаги саҳифасида Россия ва Украина армиялари ҳозирги жойида тўхташи, ҳар икки томон ўз ғалабасини эълон қилиб, ўлим ва беҳад сарф-харажатга барҳам бериши кераклигини ёзди.

16 октябрь куни Трамп ва Путин икки соатлик телефон суҳбатида Будапештдаги учрашув бўйича келишиб олган. Келгуси ҳафта икки давлат делегациялари музокарага тайёргарлик кўра бошлайди.

Венгрия ташқи ишлар вазири Петер Сийярто таъкидлашича, Путинга Будапешт ташрифи давомида Халқаро жиноий суд ордери ҳеч қандай таҳдид солмайди.

– Биз Россия Президентини ҳурмат билан қабул қиламиз ва у муваффақиятли музокарадан сўнг ватанига қайтиб кетишини таъминлаймиз, – деган мулозим.

Европа комиссияси вакили Анита Хиппер ҳам Путинга амалда ЕИ ҳудудига кириш тақиқи йўқлигини айтди:

– Учрашув ҳали расман тасдиқланмаган, ЕИ ҳудудига кириш ҳақидаги тўғридан-тўғри чеклов ҳам йўқ.

Дилшод Ҳакимов, ЎзА