Бухоро вилоят драма театрида  “Иқтидор” мактаб ансамбли танловининг вилоят босқичи бўлиб ўтди. Унда танловнинг туман (шаҳар) босқичларида ғолибликни қўлга киритган 13 та жамоа иштирок этди.

Мақсад ўқувчиларда санъатга бўлган иқтидорни аниқлаш ва уларга кўмак бериш, умумтаълим мактабларда ёшларни мусиқа санъатига бўлган муҳаббатини оширишдан иборатдир. 

Ҳайъат аъзоларининг хулосасига кўра, Ромитан туманидаги 36-мактабнинг “Шаттиқ” жамоаси учинчи, Бухоро шаҳридаги 25-мактабнинг “Наво зарб, доира” жамоаси иккинчи ўринга муносиб деб топилди. 

Якуний натижаларга кўра, Ғиждувон туманидаги 46-мактабнинг “Ёш ҳаваскорлар” жамоаси фахрли биринчи ўринни қўлга киритиб, танловнинг республика босқичига йўлланма олди. 

Тадбирнинг тақдирлаш маросимида вилоят мактабгача ва мактаб таълими бошқармаси бошлиғи Ҳамза Эллиев иштирок этиб, барча жамоаларни табриклади. Ғолибларга диплом ҳамда қимматбаҳо совғалар топширилди.

Зариф Комилов, ЎзА мухбири.