Ўзбекистонда 2025 йилда яшил водороддан минерал ўғит ишлаб чиқариш бошланади. Бу ҳар йили қарийб 33 миллион куб метр табиий газни иқтисод қилиш имконини беради.
“Ўзкимёсаноат” АЖ томонидан Саудия Арабистонининг “ACWA Power” компанияси билан ҳамкорликда Чирчиқ шаҳрида амалга оширилаётган “Яшил водородни ишлаб чиқаришни ташкил этиш” лойиҳаси ҳам мазкур йўналишдаги истиқболли ишлардан бири ҳисобланади. Лойиҳа доирасида Чирчиқ шаҳридаги аммиак заводи негизида иншоот қурилади. Қиймати 88 миллион АҚШ долларини ташкил қиладиган мазкур лойиҳанинг биринчи босқичи – 2025 йилда 3 минг тонна яшил водород ва қуввати 52 МВт шамол трубинаси ишга туширилади. Иккинчи босқичда 500 минг тонна яшил аммиак ва 2,4 ГВт шамол трубиналари иш бошлайди.
Ушбу лойиҳа орқали дунёда биринчилардан бўлиб яшил водороддан минерал ўғитларни ишлаб чиқариш, юқори қўшимча қийматга эга бўлган маҳсулотларни дунё бозорларига йўналтиришга эришилади. Яна бир эътиборли жиҳати шундаки, мазкур лойиҳа мамлакатимизда “яшил энергетика” ни ривожлантириш ва иқтисодиётга энергия тежамкор технологияларни кенг жорий қилишда муҳим аҳамият касб этади. Шунингдек, у нефт ёки табиий газ каби қазиб олинадиган ёқилғидан фойдаланишни камайтиради, маблағни иқтисод қилиш имконини беради. Қолаверса, яшил водороддан минерал ўғит ишлаб чиқариш табиий ресурслар камайишининг олдини олиш, қишлоқ хўжалигининг атроф-муҳитга салбий таъсирини қисқартиришга хизмат қилади.
<iframe width="640" height="420" src="https://www.youtube.com/embed/vT9Df9LDVMo" title="Яшил водороддан минерал ўғит ишлаб чиқарилади" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>Санжар Тошпўлатов,
Ёқубжон Мелибоев (видео), ЎзА