Япония – Ўзбекистон муносабатлари кейинги йилларда янги босқичга кўтарилиб, барча йўналишларда манфаатли ҳамкорлик алоқалари самарали давом этмоқда. Хусусан, бу япон миллий спорти дзюдо бўйича миллий терма жамоалар, федерациялар ўртасидаги дўстона муносабатлар, ўтказилаётган халқаро ўқув-машғулот йиғинларида ўз аксини топиб келмоқда.

Ўзбекистон дзюдо федерациясида Япониянинг Ўзбекистондаги фавқулодда ва мухтор элчиси Ҳатори Такаши билан ўтказилган учрашувда икки давлат дзюдо федерацияларининг ҳамкорлиги, ўзбек дзюдочиларининг жаҳон ва Осиё чемпионатлари, Олимпия ўйинларида юксак ютуқларга эришаётгани таъкидланди.

Мулоқот чоғида ўтган йили Франция пойтахти Парижда бўлиб ўтган Олимпия ўйинларида Диёра Келдиёрова -52 кг. вазн тоифасида олтин, -100 кг. вазнда Музаффарбек Тўрабоев, оғир вазнда Алишер Юсуповнинг бронза медалларини қўлга киритгани эътироф этилди.

Дўстона ўтган учрашув давомида Япония томони Ўзбекистон дзюдо федерациясига 80 комплект кимоно совға қилди. Бу, ўз ўрнида спорт дипломатиясини ривожлантириш лойиҳасининг бир қисми бўлиб, у спорт орқали халқаро алмашинув ва ҳамкорликни ривожлантиришга қаратилгани билдирилди.

Т.Рўзиев, ЎзА