2026 йил 1 январь соат 17:00 ҳолатига кўра, мамлакатимизда жами 1094 нафар чақалоқ туғилди. Уларнинг 539 нафари ўғил, 555 нафари қиз болалардир.
Ҳудудлар кесимида энг кўп туғилиш Фарғона вилоятида — 138 нафарни ташкил этди.
Шунингдек, Сурхондарё вилоятида 135 нафар, Самарқанд вилоятида 125 нафар, Қашқадарё вилоятида 121 нафар, Наманган вилоятида 110 нафар чақалоқ дунёга келган. Энг кам туғилиш Сирдарё вилоятида — 19 нафар қайд этилди.
Маълум қилинишича, туғилганлар орасида 17 та эгизак ҳолати мавжуд бўлиб, улар жами 37 нафар болани ташкил этади. Хусусан, 30 нафари икки ҳомилалик, 3 нафари уч ҳомилалик ва 4 нафари тўрт ҳомилалик эгизаклардир.
Айни пайтда республика бўйлаб туғуруқ комплекслари ва тиббиёт муассасаларида шифокорлар томонидан гўдакларга белгиланган стандартлар асосида сифатли тиббий хизмат кўрсатилмоқда.
Байрам кунлари 4913 нафар акушер-гинеколог, неонатолог, доя ва ҳамшира навбатчилик асосида аҳолига хизмат қилмоқда.
Ҳамроз Баянов, ЎзА