Мустақиллигимизнинг 34 йиллиги муносабати билан мамлакатимиз бўйлаб байрам тадбирлари ўтказилмоқда. Бу йилги байрамнинг “Ватан учун, миллат учун, халқ учун!” деган эзгу ғоя асосида ташкил этилаётгани юрт тараққиёти ва миллат келажаги учун масъулият ҳиссини кучайтиришга хизмат қилмоқда.

Ўзбекистон Республикаси Президентининг 2025 йил 10 июлдаги “Ўзбекистон Республикаси давлат мустақиллигининг ўттиз тўрт йиллик байрамига тайёргарлик кўриш ва уни ўтказиш тўғрисида”ги қарорига асосан ҳозирда шаҳар ва туманларда, парк ва хиёбонларда кенг кўламли маданий-маърифий тадбирлар ўтказилмоқда.

Шу каби тадбирлардан бири пойтахтимизнинг Шайхонтоҳур туманида жойлашган “Анҳор парк”да бўлиб ўтди. Миллий гвардия Маънавият ва маърифат маркази ижодкорлари иштирокида ташкил этилган мазкур тадбир “Янги Ўзбекистонни ёшлар билан бирга барпо этамиз!” шиори остида ўтказилди. Тадбирга 100 нафар оталиққа олинган ёшлар таклиф этилди. Шунингдек, хиёбонга дам олиш учун ташриф буюрган юртдошларимиз ҳам концерт дастуридан баҳраманд бўлди.

Тадбир давомида Миллий гвардиянинг кўргазмали саф кўринишлари, ҳарбий оркестр чиқишлари ва ранг-баранг мусиқали саҳна намойишлари томошабинларга кўтаринки кайфият улашди. 

Бу каби тадбирлар ёшларимизнинг ҳарбий хизматга бўлган қизиқишини оширади, юртга хизмат қилиш иштиёқини кучайтиради. Энг муҳими, юрт тинчлиги ва халқ фаровонлиги учун масъул бўлган ҳар бир ёш ўзининг Ватан олдидаги бурчини чуқур англайди.

<iframe width="650" height="420" src="https://www.youtube.com/embed/m504WUyFOj4" title="Yangi O‘zbekistonni yoshlar bilan birga barpo etamiz" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, ЎзА