Нукусда Фуқаролик ташаббусларини қўллаб-қувватлаш маркази Қорақалпоғистон ҳудудий бўлими ташаббуси билан “Мамлакатнинг барқарор ривожланиши – миллатлараро тотувлик ва бирлик!” мавзусида давра суҳбати бўлиб ўтди.

Тадбирда Қорақалпоғистон Республикаси Жўқорғи Кенгеси, Ўзбекистон Дин ишлари бўйича қўмитаси Қорақалпоғистон Республикаси ҳудудий бўлими, Нодавлат нотижорат ташкилотлари, миллий маданий марказлар, Ижтимоий ҳимоя миллий агентлиги ҳузуридаги аёлларни реабилитация қилиш ва мослаштириш маркази ҳамда оммавий ахборот воситалари вакиллари иштирок этди.

Давра суҳбатида Фуқаролик ташаббусларини қўллаб-қувватлаш маркази Қорақалпоғистон ҳудудий бўлимининг Европа Иттифоқининг Ўзбекистондаги ваколатхонаси “Minority Rights group” томонидан молиялаштириладиган “Мамлакатнинг барқарор ривожланиши – миллатлараро тотувлик ва бирлик!” номли лойиҳаси тақдимоти ўтказилди.

Фуқаролик ташаббусларини қўллаб-қувватлаш маркази Қорақалпоғистон ҳудудий бўлими директори Гулсара Жоллибекова лойиҳанинг мақсад ва вазифалари ҳақида маълумот берди.

Таъкидланганидек, Қорақалпоғистон Республикасида 600 дан ортиқ нодавлат нотижорат ташкилоти ҳамда  5 та миллий маданий марказ фаолият олиб бормоқда. Лойиҳанинг асосий мақсади, миллий маданий марказлар фаолиятини янада кучайтириш, халқаро ташкилотларнинг грант танловларида иштирок этишда тажрибасини ошириш ҳамда уларнинг билим ва кўникмаларини оширишда молиявий барқарорлигини таъминлаш орқали ҳамкорликни йўлга қўйишдан иборат.

– Лойиҳа давомида 5 кунлик семинар-тренинг ташкил этилиб, миллий маданий марказлар ходимлари ва ёшларнинг хорижий грант танловларида иштирок этишга қизиқишини ошириш орқали заиф қатламларининг (этник гуруҳлар) ҳуқуқ ва имкониятларини кенгайтиришга яқиндан кўмак берилади, – дейди Фуқаролик ташаббусларини қўллаб-қувватлаш маркази Қорақалпоғистон ҳудудий бўлими директори, лойиҳа раҳбари Гулсара Жоллибекова. – Ҳар бир марказ алоҳида камида 5 та грант лойиҳасини ёзиб чиқади ва менторлик хизмати кўрсатилади. Лойиҳа доирасида Тахтакўпир тумани “Қоратеран” кўли соҳилида “Мамлакатнинг барқарор тараққиёти – миллатлараро тотувлик ва ҳамжиҳатлик!” мавзусида дўстлик фестивали ташкил этилади.

Давра суҳбатида якунида Фуқаролик ташаббусларини қўллаб-қувватлаш маркази Қорақалпоғистон ҳудудий бўлими ҳамда миллий маданий марказлар ўртасида ўзаро англашув меморандуми имзоланди.

Довуд Абибуллаев, ЎзА мухбири.