Саудия Арабистонининг Даммам шаҳри мезбонлик қилаётган 18 ёшгача бўлган спортчилар ўртасидаги енгил атлетика бўйича Осиё чемпионати Ўзбекистон терма жамоаси учун ғалабаларга бой ўтмоқда.

Мусобақанинг 3 минг метр масофага югуриш баҳсларида мамлакатимиз шарафини ҳимоя қилган Анастасия Сильченкова маррага 9 дақиқа 45.17 сонияда етиб келди ва олтин медални қўлга киритди. Унинг ортидан эса хитойлик Суоланг Чжуому  10 дақиқа 0.44 сонияда финиш чизиғини босиб ўтган ҳолда кумуш медалга сазовор бўлди. Кучли учликни эронлик Самиа Шах Пари 10 дақиқа 9.07 сония билан якунлаб берди.

Шунингдек, 400 метрга тўсиқлар оша югуришда Шодиёна Раҳмонова шоҳсупанинг иккинчи поғонасидан жой олди. Шу тариқа, Ўзбекистон терма жамоаси аъзолари 2 тадан олтин ва бронза ҳамда 4 та кумуш жамғариб, умумжамоа ҳисобида учинчи ўринга чиқиб олди.

Жавоҳир Тошхўжаев, ЎзА