Волейбол бўйича Ўзбекистон U19 терма жамоаси жорий йилнинг июль-август ойларида пойтахтимизда ўтадиган жаҳон чемпионатига муносиб тайёргарлик кўриш мақсадида Россия Федерациясида ўтадиган ўқув-машғулот йиғинларига жўнаб кетди.

Ўқув-машғулот йиғини 12-23 март кунлари Россиянинг Оренбург шаҳрида, 24 март - 3 апрель кунлари Москва шаҳрида, 4 апрель - 15 апрель кунлари Қозон шаҳрида ташкил этилади.

Ўқув-йиғин жараёнларида Ўзбекистон терма жамоаси Россия Федерациясининг бир қатор жамоалари, волейбол клублари билан ўртоқлик учрашувларида қатнашади. Шунингдек, ушбу мамлакатда ташкил этиладиган халқаро турнирларда иштирок этиши назарда тутилган.

Эслатиб ўтамиз, жорий йилнинг 24 июль - 3 август кунлари Тошкентда волейбол бўйича U19 ёш тоифасида ўтказиладиган жаҳон чемпионатида 24 та миллий терма жамоа қатнашади.

Дунёнинг 24 та миллий терма жамоалари иштирокида ўтадиган жаҳон чемпионатида муносиб натижаларга эришиш Ўзбекистон терма жамоасининг асосий вазифаси ҳисобланади.

Т.Рўзиев,

ЎзА