Шу кунларда энг улуғ, энг азиз байрамимиз – Ўзбекистон мустақиллигининг 34 йиллиги нафақат юртимиз бўйлаб, балки дунёнинг турли нуқталарида ҳам катта тантана билан нишонланмоқда.

Ана шундай байрам тадбирларидан бири Ўзбекистон Республикаси Вазирлар Маҳкамаси ҳузуридаги Миграция агентлиги томонидан мамлакатимизнинг Россия Федерацияси Санкт-Петербург шаҳридаги бош консулхонаси ҳамкорлигида Ленинград вилояти Кингисепп туманидаги корхоналарда меҳнат қилаётган бир гуруҳ ватандошларимиз учун ташкил этилди. 

Ленинград вилоятига Санкт-Петербург орқали йўл олар эканмиз, бизни Нева дарёсидан салқин шамол ва шаҳарнинг қалин туман ортида бўй кўрсатган ҳашаматли сарой ва музейлари, тунги чироқлар таровати қарши олди. Бу кентга кўприклар шаҳри, деб бежизга таъриф берилмас экан. Бугун ана шу кўприклар наинки шаҳарлар ва қирғоқлар, балки юзлаб километрлар билан ажралган қалбларни ҳам бирлаштирди...

Инсон қаерда бўлмасин, унинг қалби доим она замин, таниш кўчалару қадрдон инсонлар томон талпинади. Мусофирлик қийинчиликлари ва машаққатини, Ватанни қумсаш туйғусини ўз юртидан оз бўлса-да узоқда яшаган инсонгина тўлақонли ҳис этади. Ота-онаси, фарзандини йиллаб кўрмаган, она юртнинг муқаддас тупроғини, қуёш тафтини соғинган кишининг ичидан нималар кечиши фақат унинг ўзига маълум.

[gallery-25107]

Ана шундай пайтларда юртдошларимиз маънавий далда, давлатимиз эътибори ва ғамхўрлигига ҳар қачонгидан ҳам кўпроқ муҳтож. Шу боис, бугунги кунда давлатимиз раҳбари бошчилигида хорижда яшаб меҳнат қилаётган ҳамюртларимизни ҳар томонлама қўллаб-қувватлаш, уларнинг ҳақ-ҳуқуқларини ҳимоя қилиш, муаммоларини ўрганиш ва ҳал этиш бўйича салмоқли ишлар олиб борилмоқда. Ленинград вилоятида ўтказилган байрам тадбири ҳам ана шу эътиборнинг ёрқин амалий ифодаси бўлди.

– Бугун бутун юртимиз бўйлаб байрам шукуҳи кезмоқда. Хорижда меҳнат қилаётган юртдошларимизга ҳам байрам кайфиятини улашиш мақсадида агентлигимиз ва дипломатик ваколатхоналар кўмагида Россия Федерацияси, Жанубий Корея ва Туркия каби давлатларда ҳам мустақиллигимизга бағишланган шодиёналар юқори савияда ва кўтаринки руҳда ўтказилмоқда. Байрам тадбирларидаги ўзгача руҳ, ватандошларимизнинг қувончини сўз билан ифодалаб бўлмайди. Ана шундай савобли ишга ўз ҳиссамизни қўшишдан бахтиёрмиз, – дейди Миграция агентлиги бошқарма бошлиғи Элёр Тоштемиров. 

“Ватан учун, миллат учун, халқ учун!” шиори остида ўтказилган байрам тантанаси футбол ва стол тенниси бўйича мусобақалардан бошланди. Шиддат билан кечган баҳслар юртдошларимиз ўртасидаги бирдамлик, хамжиҳатлик, дўстликни янада мустаҳкамлашга хизмат қилгани билан аҳамиятли бўлди. 

– Россияда икки йилдан бери ишлайман, – дейди наманганлик Элдорбек Эргашев. – Мусобақада ҳар бир жамоа муносиб иштирок этиб, пухта тайёргарлик ва юксак маҳоратни намойиш этди. Ўзбекистондан, оиламиздан олисда бўлсак ҳам ўзимизни ёлғиздек туймаймиз. Давлатимиз меҳри ва ғамхўрлигини доим ҳис этиб турамиз. Куни кеча Президентимизнинг Мустақиллик байрамидаги нутқини эшитиб беҳад руҳландик, янги куч-ғайрат олдик. Бугунги байрам тадбири асносида жонажон Ватанимга бир зумга бўлса ҳам қайтгандек бўлдим. Бунинг учун барча ташкилотчиларга миннатдорлик билдираман. 

Шундан сўнг файзли дастурхон ёзилиб, йиғилганларга ош тортилди. Юртимиздан келган, элимиз суйган санъаткорлар иштирокида катта концерт дастури бўлиб ўтди. Ватанга муҳаббат, тинчлик, мустақиллик, фаровонликни тараннум этувчи куй-қўшиқлар янгради. 

– Бу ерда ишлаётганимга икки йилдан ошди. Биз учун барча зарур шароитлар яратилган, Миграция агентлиги вакиллари доим ҳолимиздан хабар олиб туришади. Бугун Ўзбекистон барча соҳаларда жадал ривожланаётганини бутун дунё баралла айтмоқда. Рўй бераётган ижобий ўзгаришларни олисдан туриб кўриб, бизнинг ҳам қалбларимиз қувонч ва фахрга тўлмоқда. Бизга шунчалик эътибор қилиб, ана шундай ажойиб байрам тадбирини ташкил этишда бош бўлган барча инсонларга мингдан-минг раҳмат, – дейди Хоразм вилоятидан келган Жўрабек Юсупов. 

Тадбир якунида мусобақалар ғолиб ва совриндорларига медаль ва кубоклар, шунингдек, байрам тантанасини ташкил этишда фаол иштирок этган бир гуруҳ ходимларга ташаккурномалар топширилди. 

Жавлон Азизов, ЎзА

Россия, Ленинград вилояти