Ватан учун, миллат учун, халқ учун!

Ҳар инсоннинг ҳаётига, биродар – 

Энг аввало уриб турган қалб керак!

Яна унга лозимдир уч ифода:

Ватан керак, миллат керак, халқ керак!

 

Дер: “яхшидан қолар фақат яхши ном”,

Топа олсанг чин ҳаётга мос йўллар.

Сен яхши бўл, борлиқни сев, вассалом:

Ватан қўллар, миллат қўллар, халқ қўллар!

 

Ҳатто қултум сув тотини билмаслар

Ватанидан айро бўлган ҳар инсон.

Ўзни тани, ўзлигингни бил дастлаб -

Ватан сенсан, миллат сенсан, халқ сенсан!

 

Сен дунёга уйғоқ назар солгин-да,

Қара, қанча ғалаён-у хавф турар!

Тинчлик учун байроқдор бўл, ортингда –

Ватан турар, миллат турар, халқ турар!

 

Ҳақиқат шул – олам бўлар гулистон,

Ҳар банданинг уйғоқ бўлса қалб кўзи.

То бор экан – юрак толмас уришдан –

“Ватан” сўзи, “миллат” сўзи, “халқ” сўзи!

 

Бу сўзларни ҳис қилмаслик зўр айбдир,

Тупроқ – номус, йигит учун, мард учун!

Бахш этмасанг, танангдаги жон ҳайфдир –

“Ватан учун, миллат учун, халқ учун!”

Ориф ТЎХТАШ

2025 йил, 15 август