Буюк Британия ва Германия Брюсселда 50 давлат иштирокида ташкил қилинадиган учрашувга тайёрланаркан, Киевга яна 450 миллион фунт стерлинг миқдорида ҳарбий ёрдам берилишини эълон қилди. Бу ҳақда BBC ёзди.

Мудофаа расмийлари Россия Президенти Владимир Путинга босим ўтказиш, уни Украина билан урушни тўхтатишга мажбур қилиш учун йиғилмоқда.

– Украина мудофаасини мустаҳкамлашда давом этиб, тажовузкорликнинг олдини олиш учун ҳаракат қилишимиз керак, – деди Бирлашган Қироллик мудофаа вазири Жон Хили.

Бу галги кўмак юз минглаб дрон, танкка қарши мина ва ҳарбий машиналар таъмирланиши учун ишлатилади. Тахминан 350 миллион фунт стерлингни Британия тақдим этади. Шунингдек Норвегия воситачилигида Украина халқаро жамғармаси орқали қўшимча молиялаштириш ҳам назарда тутилган.

Мусулмон Зиё, ЎзА