Туркманистон Президенти Сердар Бердимуҳамедов “Марказий Осиё – Европа Иттифоқи” биринчи саммитида иштирок этиш учун Ўзбекистонга келди.

Самарқанд халқаро аэропортида олий мартабали меҳмонни Ўзбекистон Республикаси Бош вазири Абдулла Арипов ва бошқа расмийлар кутиб олди.   

Мазкур саммит кун тартибига мувофиқ, Марказий Осиё давлатлари ва Европа Иттифоқи ўртасидаги кўп қиррали муносабатлар ва амалий ҳамкорликни ривожлантириш истиқболлари кўриб чиқилади.   

Дўстлик, ишонч, яхши қўшничилик ва стратегик шериклик тамойилларига асосланган кўп қиррали Ўзбекистон ва Туркманистон муносабатлари жадал ривожланиб бораётгани  таъкидлаш ўринли.   

Биргина мисол, ўтган йили ўзаро товар айирбошлаш ҳажми бир миллиард доллардан ошган. Саноат, энергетика, транспорт, қишлоқ ва сув хўжалиги, иқтисодиётнинг бошқа тармоқларида ўзаро манфаатли ҳамкорлик ривожланмоқда ва кооперация чуқурлашмоқда.   

Биргаликда “Шовот – Тошовуз” чегараолди савдо зонаси ташкил этилмоқда. Фаол ҳудудлараро алоқалар ва маданий-гуманитар алмашинув дастури доирасида тадбирлар доимий ўтказиб келинмоқда.   

<iframe width="640" height="420" src="https://www.youtube.com/embed/C8p4HycfXRs" title="Turkmaniston Prezidenti Serdar Berdimuhamedov Samarqandda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Икром АВВАЛБОЕВ,

Отабек МИРСОАТОВ(сурат), ЎзА мухбирлари