Шу кунларда мамлакатимизнинг туристик салоҳияти ортиб, ҳудудларда хорижий ва маҳаллий туристлар учун қулай шароитлар яратилмоқда.

Хусусан, замонавий инфратузилмани жадал ривожлантириш, кўрсатилаётган туристик, меҳмонхона ва транспорт хизматларини кенгайтириш ва сифатини ошириш чоралари кўрилмоқда. Бу эса юртимизга хорижий меҳмонларнинг тобора ортишига сабаб бўлмоқда.

Миллий cтатистика қўмитаси маълумотига кўра, юртимизга сўнгги 5 ой давомида 4,2 миллион нафар чет эл фуқаролари туристик мақсадларда ташриф буюрган. Бу кўрсаткич ўтган йилнинг мос даври билан солиштирганда 1,4 миллион нафарга ошган.  

Таҳлил Ўзбекистонга италиялик туристлар оқими 13,5 фоизга ошганини кўрсатмоқда. Жумладан, январь-май ойларида жами 17,4 минг нафар Италия фуқаролари туристик мақсадларда юртимизга келган. Бу кўрсаткич ўтган йилнинг мос даврига нисбатан 2,1 минг нафарга ёки 13,5 фоизга ошган.

Италия фуқароларининг 16 минг 410 нафари саёҳат, 530 нафари қариндошларни йўқлаш, 400 нафари хизмат юзасидан, 43 нафари эса ўқиш мақсадида келган.

Шунингдек, юртимизга японияликларнинг ҳам қизиқиши ортган. Бунга жорий йилнинг январь-май ойларида жами 10 минг нафар Япония фуқаролари туристик мақсадларда Ўзбекистонга келгани яққол мисол бўла олади. Бу кўрсаткич ўтган йилнинг мос даври билан солиштирганда 3,5 минг нафарга ёки 53,2 фоизга ошган.  

Уларнинг 8 минг 950 нафари саёҳат, 751 нафари қариндошларни йўқлашга, 286 нафари хизмат юзасидан ҳамда 37 нафари тижорат ва ўқиш мақсадида келишган.  

Гулноза Бобоева,

ЎзА