Мамлакатимиз пойтахти Тошкент шаҳрида Парламентлараро Иттифоқнинг 150 - юбилей ассамблеяси ўз ишини бошлади.

2025 йил 5 - 9 апрель кунлари бўлиб ўтадиган анжуманда дунёнинг 190 га яқин давлати парламентлари вакиллари, халқаро ва парламентлараро ташкилотдан 2 мингга яқин делегат иштирок этмоқда.

Эътироф этиш керакки, парламентлар билан боғлиқ бундай кенг кўламли нуфузли анжуман нафақат Ўзбекистон, балки Марказий Осиё тарихида илк маротаба минтақамизда ўтказилмоқда.  

Президентимиз Шавкат Мирзиёев ташаббуси асосида бу тадбирнинг юртимизда ташкил этилгани жаҳон ҳамжамияти томонидан Ўзбекистоннинг жаҳон сиёсати марказларидан бири сифатида эътироф этилаётганини ҳам тасдиқлайди.

Ассамблеяда иштирок этаётган Парламентлараро Иттифоқ президенти Тулия Эксон билан суҳбатлашдик:

– Парламентлараро Иттифоқнинг 150-ассамблеясига мезбонлик қилаётган Ўзбекистонга чуқур миннатдорлигимни билдираман. Бундай йиғилишларни ташкил этиш осон эмас. Шу сабабли, айниқса, Ўзбекистон Республикаси Президентига бизни ўз мамлакатида қабул қилгани учун алоҳида ташаккур айтаман. Сенат Раисига барча ташкилий масалаларни пухта амалга оширгани учун раҳмат дейман.  

Бизнинг бу ерга ташрифимиз, албатта, Ўзбекистонга бўлган юксак ҳурматимиз ва бу ерда олиб борилаётган жараёнларга катта эътибор қаратаётганимизни кўрсатади. Шу билан бирга, Ўзбекистон Парламентлараро Иттифоқ тамойилларини – дипломатия, демократия ва бошқа соҳаларда фаол қўллаб-қувватлаётган давлатлардан биридир.

Кейинги йилларда Ўзбекистонда амалга оширилган ислоҳотларни эътироф этамиз ва мамлакатнинг қандай тараққий этганини кўриб турибмиз. Шу муносабат билан барқарор ривожланиб бораётган мамлакат раҳбариятини ҳаракатлари натижаси билан табриклайман.  

Ассамблея давомида биз адолат ва ижтимоий тараққиёт мавзуларини жамлаб, улар қандай уйғунлашиши мумкинлигини муҳокама қиламиз.  

Шу йил давомида биз Пекин Ҳаракат платформасининг 30 йиллигини ҳам нишонлаймиз. Тадбир аёллар ҳуқуқлари ҳақида бўлиб, бу эса тараққиётнинг ажралмас қисмидир.  

Ўзбекистон Президентининг қуйи ва юқори палаталарда аёллар сонини кўпайтириш йўлида кўрсатган ҳаракатларини таъкидлаб ўтмоқчиман. Умумий ҳисобда, Ўзбекистон парламентида аёллар сони 37 фоиздан ошди. Бу эса, ҳозирда жаҳондаги ўртача кўрсаткич (26 фоиз)дан анча юқори. Бу кўрсаткич Ўзбекистоннинг бу йўналишда катта ютуқларга эришганини билдиради.  

Ишончим комилки, жамиятнинг бошқа қатламлари ҳам шундай имкониятларга эга.

Шу сабабли, адолат ва ижтимоий тараққиёт уйғунлигини муҳокама қилиш учун Ўзбекистон энг муносиб жой эканига аминман.

Яна бир бор таъкидламоқчиманки, бундай ассамблеяга мезбонлик қилиш мамлакатнинг Парламентлараро Иттифоқ қадриятларига содиқлиги ва фаол иштирокини англатади.  

Акс ҳолда, ҳеч ким бундай йиғинларга қатнашмаган бўлар эди. Шу сабабли, мамлакат Президентига парламентлараро дипломатияни қўллаб-қувватлаётгани учун яна бир бор миннатдорлик билдираман.

Бизнинг бу ерда бўлишимиз Ўзбекистоннинг Парламентлараро Иттифоқ фаолиятига йиллар давомида қўшган ҳиссасини ифодалайди.

Жорий йил июль ойида Женевада Бутунжаҳон Спикерлар конференциясини ташкил қиламиз ва бу тадбирга Сенат Раисини ҳам таклиф қиламиз. Унинг конференциялардаги иштироки ва тадбирларни самарали ўтказишга қўшаётган ҳиссаси, шунингдек, Ўзбекистон парламент аъзоларининг фаоллиги биз учун жуда муҳим.

<iframe width="650" height="420" src="https://www.youtube.com/embed/xNB058T92po" title="Tuliya Ekson:Adolat, ijtimoiy taraqqiyot uygʻunligini muhokama qilish uchun Oʻzbekiston eng munosib" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Норгул Абдураимова, Дониёр Якубов, Улуғбек Тўхтаев (монтаж), ЎзА