Сурхондарё вилояти божхона бошқармаси “Гулбаҳор” чегара божхона пости ходимлари мамлакатимиз ҳудудидан транзит тарзда ҳаракатланаётган юк автотранспорт воситасидаги помидор ўрнига қурилишда ишлатиладиган шпаклёвка юкланганини аниқлади.
Божхона назорати чоғида юк машинасининг ҳужжатлари ва пломбалар жойида экани тасдиқланди. Бироқ, тиркаманинг одатда очилмайдиган қисми бузилгани аниқлангач, бу ҳолат божхоначиларда шубҳа уйғотди. Транспорт воситаси чуқурлаштирилган божхона кўригидан ўтказилганида помидор ўрнида 22 тонна қурилиш шпаклёвкаси олиб кетилаётгани маълум бўлди.
Ҳолат юзасидан ўтказилган тезкор тадбирда аниқланишича, транзит тартибида қўшни давлатга чиқиб кетиши лозим бўлган қиймати 600 миллион сўмлик 20 тоннадан ортиқ помидор Термиз туманидаги омборлардан бирига ноқонуний тушириб қолдирилган. Тезкор қидирув олиб борилганида туширилган помидор маҳсулоти иккита “Isuzu” русумли юк автотранспорт воситасига қайта юкланиб, Сурхондарё-Самарқанд йўналишида ҳаракатланаётганда қўлга тушди. Помидор эса вақтинча сақловга олинди.
Айни пайтда божхона органлари терговга қадар текширув ҳаракатларини олиб бормоқда.
Холмўмин Маматрайимов, ЎзА мухбири