АҚШ етакчиси Дональд Трампнинг фикрича, агарда Россия армияси Киевга асфальт йўл орқали борганида тўрт соатда пойтахтга етиб, шаҳарни ишғол қилган бўлар эди.Аммо сиёсий таҳлилчилар бу фикрга қўшилмайди, дея хабар беради “Euronews”.

Бу Трамп томонидан Украинадаги низо ҳақида кўплаб тасдиқланмаган ёки ишончсиз даъволардан, дейиш мумкин. У Қўшма Штатлар раҳбарлигига қайтганидан бери бир неча бор шундай баёнотлар берган.

Таҳлилларга кўра, РФнинг Киевни босиб олиш режалари Украина ҳарбийларининг муваффақиятли стратегияси, шунингдек, Россия томонидан йўл қўйилган логистик ва тактик хато сабаб барбод бўлганини кўрсатади. Масалан, Ирпень дарёсининг ғарбий қисмидаги ботқоқлик ҳақиқатан ҳам танкларнинг ҳаракатини қийинлаштирган, аммо бу Россиянинг Киевга юриши учун ҳал қилувчи асосий тўсиқ бўлмаган.

Зиддиятларни таҳлил қилувчи институт мутахассислари хулосасига кўра, 2022 йил февралдаги Киев учун курашнинг биринчи босқичида Россия қўшинлари Беларусь билан чегарадош ҳудуддан Киевгача бўлган 150 км масофани очиқ автомобиль йўли  орқали босиб ўтган. 

– Россияликлар эски хариталардан фойдаланган, бунинг устига қўшинлар орасидаги алоқа суст бўлган, -дея таъкидлашмоқда ҳарбий мутахассислар. – Шунингдек, украинлар имкони борича йўл белгилари ва кўрсаткичларни олиб ташлашган ёки бўяб ташлашган, бу эса Россия танкларини адаштирган. Ирпень дарёси автотранспорт ҳаракати учун жиддий тўсиқ бўлган, аммо Киевнинг шарқий қисмида бундай табиий тўсиқлар бўлмаган.

Тегишли компаниялар томонидан тақдим этилган ва махсус таҳлилдан ўтган сунъий йўлдош тасвирларида ҳам Россия танк қўшинлари 2022 йил март бошларида Киев томон автомобиль йўли орқали ҳаракатланаётгани яққол кўринади.

Гарчи Россия қўшинлари сонига кўра устун бўлган бўлса-да, аммо украин армияси Россиянинг ҳаво устунлигини қўлга киритиш уринишларини самарали равишда бартараф этган. Жумладан, рус зобитларининг Киев шимолида жойлашган Гостомел аэродромини қўлга киритиш режаси амалга ошмаган.

Экспертларга кўра, Гостомел аэропортини тезда эгаллаш Россиянинг Киевни босиб олиш режасидаги муҳим қисмлардан бири бўлган.

– Агар Россия Гостомел аэродромини эгаллаганида, эҳтимол, улар можаронинг дастлабки кунларида Киев марказигача етиб боришган бўларди, – дейилади ҳарбий экспертларнинг таҳлилларида. 

Бироқ мутахасслар Трампнинг гапларини тўлиқ инкор этмаган ҳолда, Киевга юриш вақтидаги баҳорги об-ҳаво ҳақиқатдан ҳам Россия учун муаммолар туғдирган, лекин бу асосий  тўсиқ бўлмаган, дейишмоқда. 

Ҳақиқатан ҳам, ўшанда Россия армиясининг бир қатор техникаси лой далаларда қолиб кетган, баъзилари ташлаб кетилган. Бу  техникалар кейинчалик украин фермерлари томонидан олиб кетилиб, Украинанинг ҳарбий эҳтиёжлари учун қайта жиҳозланган.

<iframe width="650" height="420" src="https://www.youtube.com/embed/t-yiKcnRZYM" title="Trampning gaplarida “jon” bormi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА