АҚШ Президенти Дональд Трамп россиялик ҳамкасби Владимир Путин билан бўлажак учрашувга катта умид боғлаётганини таъкидлади. Шу билан бирга у Аляскада бўлиб ўтадиган ва янада муҳим, деб баҳоланаётган саммит ҳақида ҳам гапириб, кейинги тадбирда Украина етакчиси Володимир Зеленский ва эҳтимол, Европа Иттифоқининг айрим етакчилари ҳам иштирок этишини маълум қилди.

Путин билан музокара арафасида Трамп журналистларга берган баёнотида шундай деган:

– Яхши учрашув бўлади, деб ўйлайман. Бинобарин, янада муҳимроқ воқеа саммитдан сўнг юз беради. Биз тинчлик масаласида жиддий мулоқот олиб борамиз. Иккинчи учрашув самарали кечиши учун, аввало, Путин билан дастлабки музокара ижобий натижа бериши лозим.

Трамп кейинги саммит ҳам Аляскада бўлиб ўтиши мумкинлигини таъкидлаган:

– Мен бу учрашувни саммитдан сўнг иложи борича тезроқ ўтказишни хоҳлайман. Аляскада қолиш ва шу ерда мулоқот қилиш осон ва мақбул.

Учинчи шахслар – Зеленский ва Европанинг етакчи давлатлари масъуллари ҳам музокарага жалб этилиши эҳтимолига тўхталаркан, Трамп кўҳна қитъадан ҳам раҳбарлар таклиф этилиши мумкинлигини маълум қилди. Журналистларнинг “Путин билан учрашувни мукофот сифатида қабул қилиш мумкинми?” мазмунидаги саволига Трамп қатъий рад жавобини берди:

– Президент Путин тинчликка эришишни хоҳлаяпти. Мен бўлмаганимда, у бутун Украинани эгаллаб олган бўларди. Президент эканман, РФ раҳбари мен билан ҳисоблашишига тўғри келади.

Трамп сайлов олди кампанияси давомида бир неча бор Украинадаги урушни бир кунда тўхтатишга қодирлигини таъкидлаган.

АҚШ етакчиси Зеленский билан учрашиш ниятини билдирган бир пайт, Украина Президенти ҳам саммитнинг асосий мақсади сифатида “ўт очишни тўхтатиш”ни кўрсатмоқда.

Германия Канцлери Фридрих Мерц билан ўтказилган қўшма матбуот анжуманида Зеленский шундай деди:

– Бугун ўт очишни тўхтатиш ҳақида гаплашдик. Президент Трамп ҳам айни масала Путин билан суҳбатда устувор йўналиш бўлишини билдирди. Умид қиламанки, тинчликка эришилади.

Шунингдек, Европа етакчилари ҳам Трамп ва Путин ўртасидаги мулоқотни тўғри дипломатик йўналишда ушлаб туришга уринаётганини маълум қиларкан, жумладан Мерц шундай деди:

– Бизнинг вазифамиз – Аляскадаги учрашувни халқаро тинчликка хизмат қилувчи майдонга айлантириш.

Бу майдондаги мулоқот тинчликка қанчалик хизмат қилиши бугун маълум бўлади.

<iframe width="640" height="480" src="https://www.youtube.com/embed/6b-8oEO4Cb0?si=5ktQxCoL4zDtpfxq" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА