АҚШ Иммиграция ва божхона назорати (ICE) хизмати Президент Дональд Трамп лавозимига киришгандан кейинги даврда 100 мингдан кўп одамни мамлакатдан чиқариб юборди, деб хабар тарқатди “New York Post” газетаси Ички хавфсизлик вазирлигидаги манбага таяниб.

Хабарда аниқлик киритилишича, жами 113 минг киши ҳибсга олинган.

Март ойида АҚШ бўйлаб ноқонуний чегарани кесиб ўтиш ҳолати рекорд даражада пасайган. Расмийлар ноқонуний муҳожирларнинг аксариятини Мексикага жўнатган.

20 январь куни бўлиб ўтган инаугурация маросимидан сўнг Трамп илк чиқишида АҚШга хуфиёна киришни зудлик билан тўхтатиб, миллионлаб муҳожирларни экстрадиция қилиш жараёнини бошлашга ваъда берган. Қолаверса, жанубий чегарадаги вазият туфайли миллий фавқулодда ҳолат эълон қилган.

Америка Иммиграция кенгаши таҳлилчилари фикрича, Мексика АҚШга муҳожирлар келадиган асосий давлат ҳисобланади. Бу юрт фуқаролари жами мигрантларнинг 22,8 фоизини ташкил қилади. Рўйхатда иккинчи ўринни Ҳиндистон (6,1 фоиз), учинчи ўринни Хитой (4,6 фоиз) банд этган.

С.Раҳимов, ЎзА