Трамп: Ҳурмуз бўғозини очишда иттифоқчилар ёрдам бермаса, оқибат НАТО учун оғир келади
АҚШ Президенти Дональд Трамп иттифоқчилар Ҳурмуз бўғозини очишга ёрдам бермаган тақдирда НАТО жуда ёмон келажак билан тўқнаш келишидан огоҳлантирди. Бу ҳақда у “Financial Times” нашрига берган интервьюсида гапирган. Шунингдек, АҚШ етакчиси ХХР Раиси Си Цзиньпин билан режалаштирилган саммит ҳам кечикиши мумкинлигини қўшимча қилди.
Таъкидланишича, Хитой ҳам бу жараёнда фаол иштирок этиши керак, чунки Пекинга йўналтирилган нефтнинг салмоқли қисми айнан шу йўлдан ўтади. Демак, Америка раҳбари Чин диёрига ташрифдан олдин Хитойнинг бу масалага ёндашувини билиш истагида.
Шу кунларда АҚШ молия вазири Скотт Бессент ва Хитой бош вазири ўринбосари Хэ Лифэнь Парижда икки кунлик музокара олиб борди. Томонлар савдо соҳасидаги келишмовчиликни бартараф этиш ва Трампнинг март ойи охирида Хитойга ташрифи учун замин яратиш масаласини муҳокама қилмоқда.
Трамп фикрича, Ҳурмуз бўғози орқали амалга ошириладиган денгиз юк ташувидан фойда кўраётган давлатлар йўлак хавфсизлиги ва очиқлигини таъминлашда ҳам фаол бўлиши лозим. Унинг сўзларига кўра, манфаатдор томонлар ҳудуд муҳофазаси бўйича масъулиятни ҳам бўлишиши керак.
Ф. Яхшибоева, ЎзА
