АҚШ президенти Дональд Трамп америкаликларга мурожаат қилиб, ўз маъмуриятининг сўнгги бир йил ичидаги “тарихий” ютуқлари ва келажак режалари ҳақида гапирди.

Оқ уй раҳбари ўз нутқини сўнгги 11 ой ичида унинг маъмурияти АҚШнинг аввалги етакчиларидан фарқли ўлароқ, кўпроқ ишларни амалга оширганини эълон қилишдан бошлади.

Трампнинг сўзларига кўра, у АҚШ раҳбарлигини энг ёмон ҳолатда қабул қилиб олган ва уни тузатиш устида ишламоқда. Унинг айтишича, Қўшма Штатлар 50 йил ичида биринчи марта мамлакатдан ноқонуний мигрантларнинг чиқиб кетишини кўрмоқда. Америка армияси эса дунёдаги энг кучли давлатлардан бирига айланган. АҚШга денгиз орқали гиёҳванд моддалар олиб кириш 94 фоизга камайган.

Келгуси режаларга тўхталар экан, Трамп Федераль резервнинг кейинги раҳбари асосий фоиз ставкасини пасайтиришга ишонадиган одам бўлади, деди. Таҳлилчилар АҚШ президенти мурожаатида яна бир унсурга эътибор қаратишди. Оқ уй раҳбари ўз мурожаатида тарифларни ўзининг энг севимли сўзи деб эълон қилган.

Трампнинг қўшимча қилишича, АҚШ дунё ҳеч қачон кўрмаган иқтисодий юксалиш билан юзлашмоқда. 

С.Раҳимов, ЎзА