– Американи биргаликда ҳар қачонгидан каттароқ, яхшироқ, кучлироқ, бойроқ, соғломроқ ва диндорроқ қиламиз, – деб ёзди АҚШ Президенти Дональд Трамп ижтимоий тармоқдаги саҳифасида.

У 20 январь куни бўлиб ўтган инаугурация маросимида ҳам Қўшма Штатларни бошқа мамлакатлардан ажралиб турадиган, ўзига хос мамлакат қилишга ваъда берган. Шунингдек, ҳали дунё кўрмаган энг кучли армия яратиш режасини ҳам эълон қилган.

Йил бошида Оқ уй раҳбари Хитой ва Россия таъсирига қарши туриш учун Гренландия ороли Қўшма Штатлар таркибига кириши кераклиги, Панама канали устидан назорат қайта тикланишини ҳам айтган. Бундан ташқари, АҚШга қўшилса, Канадага кенг солиқ имтиёзи берилишини ҳам ваъда қилган.

Ўз навбатида Оттава бу ғояни доимий равишда рад этиб, мамлакат мустақиллиги ва миллий ўзига хослигини сақлаб қолиш кераклигини таъкидлаб келади.