Чирчиқ гарнизонидаги ҳарбий қисмларнинг бирида қурол-аслаҳа ва ҳарбий техникаларни қишки шароитдан ёзги мавсумда фойдаланиш режимига ўтказиш бўйича кўргазмали машғулотлар ташкил қилинди.

Кўргазмали машғулот аввалида округ қўшинлари қўмондонлиги томонидан қурол-аслаҳа ва ҳарбий техникаларга мавсумий техник хизмат кўрсатиш вақтида бажариладиган ишлар тартиби ва ҳажми бўйича шахсий таркибга тушунчалар етказилиб, ҳарбий техникаларни юқори жанговар шайлик даражасида ушлаб туриш ҳамда об-ҳавонинг турли шароитида созлигини таъминлаш борасида тавсиялар берилди. 

Кўп йиллик тажрибага эга ҳарбий хизматчилар назоратида иштирокчилар амалий машғулотларда қатнашиб, совитиш суюқликлари алмаштириш, жанговар машина агрегат ва тугунларини текшириш, фильтрларни тозалаш ва алмаштириш ишлари, ёқилғи-мойлаш ашёларини янгисига алмаштириш ҳамда электр ва алоқа жиҳозларининг созлигини назоратга олиш бўйича топшириқларни бажарди. 

Якунда ҳар бир ўқув нуқтаси раҳбарлари томонидан мавсумий хизмат кўрсатишнинг аҳамияти, асосий хизмат кўрсатиш босқичлари тўғрисида батафсил маълумотлар етказилди. 

*** 

Оққўрғон туманининг “Маданият”, “Зарбдор”, “Султонобод” ҳамда “Қонқа” ҳудудларида “Камбағалликдан фаровонлик сари” дастури бўйича кенг кўламли ишлар амалга оширилмоқда. Хусусан, “Маданият” МФЙ ҳудудида аҳоли томорқа ер майдонларни суғориш учун хизмат қилувчи ички ариқда таъмирлаш ишлари олиб борилмоқда. 

Умумий узунлиги 3,5 километр бўлган ушбу ариқда ишлари бажарилиб, 1,8 километр қисми бетонлаштирилди. Қолган қисмидаги ишларни ҳам тез орада ниҳоясига етказиш учун 4 дона махсус машина-механизм ҳамда 40 нафар ишчи-ходимлар астойдил меҳнат қилмоқда. Шунингдек, “Султонобод” МФЙ ҳудудидаги узунлиги 1,1 километр бўлган ички ариқда таъмирлаш ишлари ҳам якунига етказилмоқда. 

*** 

Тошкент вилоятида “Янги Ўзбекистон Олимпия чўққилари” спорт мусобақаларини ўтказиш юзасидан семинар ташкил этилди. Тегишли мутасадди федерациялар, спорт жамоатчилиги вакиллари иштирокида ўтказилган тадбирда федерациялар томонидан амалга оширилган ишлар, республика ва халқаро мусобақаларга тайёргарлик даражаси борасидаги масалалар кўриб чиқилди. 

Шунингдек, мамлакатимизда илк бор ўтказилаётган “Янги Ўзбекистон Олимпия чўққилари” спорт мусобақасини Тошкент вилоятида босқичма-босқич ташкил этиш ва республика финал босқичига тайёргарлик кўриш ҳақида сўз борди. 

Семинарда вилоят Спорт бошқармаси бошлиғи Р.Бобоқулов сўзга чиқиб, “Янги Ўзбекистон Олимпия чўққилари” спорт мусобақаларининг минтақа ва Тошкент вилоят босқичини юқори савияда ташкил этиш ва ўтказиш тартиби, жойлари, спорт жиҳозлари билан таъминоти, спортчиларни тайёрлаш тизими каби вазифалар белгиланди. 

А.Мусаев,ЎзА