Янгийўл шаҳар ҳокимлиги катта мажлислар залида “Обод ва хавфсиз маҳалла” тизимини такомиллаштириш юзасидан ўқув-семинар ўтказилди. Унда Тошкент вилояти прокуратураси, вилоят ИИББ, адлия бошқармаси ва Янгийўл шаҳар прокуратураси, шаҳар ИИБ ҳамда тегишли масъуллар иштирок этди.

Президентимизнинг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ҳамда Вазирлар Маҳкамасининг 2024 йил 30 ноябрдаги “Обод ва хавфсиз маҳалла” тизимини такомиллаштириш тўғрисида”ги қарори мазмун-моҳиятини маҳалла еттилиги вакилларига тушунтирилди. 

Жумладан, жиноят содир этилаётган маҳаллалардаги криминоген вазиятга таъсир қилаётган асл омилларни ўрганиш ҳамда уларнинг хусусиятларидан келиб чиқиб, манзилли профилактика тизимини йўлга қўйиш лозимлиги айтилди. Янгийўл шаҳридаги 22 та маҳалладан келган маҳалла еттилиги вакилларига келгусида амалга ошириш лозим бўлган вазифалар батафсил тушунтирилди. 

*** 

Оҳангарон шаҳар солиқ инспекцияси ва Иқтисодий жиноятларга қарши курашиш департаменти ҳудудий бўлими ходимлари ҳамкорлигида дори воситаларининг ноқонуний савдоси ҳамда 2D сканер тизими бўйича тадбир бўлиб ўтди.

Унда тадбиркорларга мутахассислар томонидан дори воситаларининг қонуний реализациясини таъминлаш, лицензиясиз фаолият юритишнинг олдини олиш муҳимлиги таъкидланди. Шунингдек, 2D сканер тизимининг жорий этилиши маҳсулотларнинг қонунийлигини аниқлаш, сохта дориларга қарши самарали курашиш ҳамда истеъмолчилар ҳуқуқларини ҳимоя қилишга хизмат қилиши ҳақида тушунтириш берилди. 

*** 

Бугун, 1 апрель куни соат 08:00 лар чамаси Оҳангарон тумани ҳудудидан ўтган А373 “Тошкент-Ўш” автомобиль йўлининг 34-километрида “Howo” ва “Зил” русумли юк автомобиллари ҳамда “Cobalt” ва “Nexia” русумли енгил автомобиллар иштирокида йўл-транспорт ҳодисаси содир бўлган. Унинг натижасида ҳаракат иштирокчилари соғлиғига зиён етмаган. Транспорт воситалари техник шикастланган.

Ҳозирда ҳолат юзасидан Оҳангарон тумани ИИБ ЙҲХБ томонидан суриштирув ишлари олиб борилмоқда. 

*** 

Ўрта Чирчиқ ва Чиноз туманида вилоят ҳокими Зойир Мирзаев бошчилигида қишлоқ хўжалиги масалаларига бағишланган йиғилиш бўлиб ўтди. Хусусан, Ўрта Чирчиқ туманидаги йиғилишда вилоят ҳокими жорий йилда чигит экиш ишларига пухта тайёргарлик кўриш, туманда 2025 йил пахта ҳосили учун 4 минг 200 гектар майдонга чигит экиш режа қилинаётгани, шундан 1 минг 280 гектарига Хитой тажрибаси асосида, қолган 2 минг 80 гектар майдонга маҳаллий уруғ қадалишини таъкидлади. 

Шунингдек, бошоқли дон экинларини парваришлаш, жорий йил ҳосили учун ғалла агротехника ишлари, ариқларни бетонлаштириш ҳамда фермер хўжаликлари дала четларига мевали ва манзарали кўчатлар ўтқазиш ҳолати танқидий таҳлил қилинди. 

Чиноз туманида ўтказилган йиғилишда ҳам юқоридаги масалаларга тўхталиб, айрим тижорат банклари томонидан фермер хўжаликларга кредит очилмагани ҳамда соҳадаги қатор мавжуд камчиликлар танқид остига олинди.

А.Мусаев, ЎзА