Тошкент метрополитенида энди йўловчилар кафт орқали тўлов амалга оширишлари мумкин. Бу учун бекатларда ўрнатилган инфокиосклар орқали бир марта рўйхатдан ўтиш талаб этилади.
Бу ҳақда Тошкент шаҳар ҳокимлиги маълум қилди.
Ҳозирги кунда 29 та бекатда инфокиосклар фаолият юритмоқда. Шу бекатлардаги 71 та турникетда кафт орқали тўлов имконияти яратилган. Янги тизим йўловчилар орасида секин-аста кенгайиб бормоқда.
Агар бир кунда бир миллионга яқин йўловчи ташилса, уларнинг 3-4 фоизи кафт орқали тўловдан фойдаланиши мумкин. Янги тизим жорий этилгандан сўнг касса олдидаги навбатлар камайган.
Қолган 21 та станцияда бу тизим 2026 йилда жорий қилиниши режалаштирилган.
Йўловчилар MyID PalmPay орқали тўлов тизимидан фойдаланиши учун 16 ёшдан катта бўлиб, шахсий ID карта ёки паспортга эга бўлиши керак. Тўлов фақат рўйхатдан ўтган шахс номига амал қилади. Агар йўловчи билан ҳамроҳлар бўлса, уларга алоҳида тўлов амалга оширилади.
Ш.Маматуропова, ЎзА