Томорқа даромад манбаи. Сўнгги йилларда олиб борилаётган кенг кўламли ислоҳотлар самараси ўлароқ юртдошларимиз буни теранроқ англамоқда. Бугунги кунда аксарият хонадон эгалари мавжуд томорқаларидан 2-3, айримлари эса 4 мартагача ҳосил олмоқда.

Президентимиз ташаббуси билан жорий этилган “Камбағалликдан фаровонлик сари” дастури бугун ўз ижобий натижасини бермоқда. Дастур доирасида маҳаллалардаги оилалар ҳолати ўрганилиб, кам даромадли оила вакиллари ҳар томонлама қўллаб-қувватланмоқда. Уларни камбағалликдан чиқариш чоралари кўриляпти.

Навоий вилоятининг Кармана туманидаги Арабхона маҳалласида ҳам дастур доирасида бир қатор ишлар амалга оширилмоқда.

 – Маҳалламизда 1095 та оилада 3600 нафардан зиёдроқ аҳоли истиқомат қилади, – дейди маҳалладаги ҳоким ёрдамчиси Жасур Мўминов. – Маҳалламиз драйвери деҳқончилик бўлиб, хонадонларнинг 80 фоизи деҳқончилик билан шуғулланади ва томорқаларида қишлоқ хўжалиги маҳсулотлари етиштиради. Қарийб уч йил давомида 300 дан ортиқ фуқароларга тадбиркорликни ривожлантириш ва қўшимча даромад топиш мақсадида 6 миллиард сўмдан зиёд имтиёзли кредит маблағлари ажратилди. Жорий йилда эса 3 миллиард сўм миқдорида кредит маблағлари ажратилиши режалаштирилган. Ҳозирда хонадонларда иссиқхоналар қурилиб, йил бўйи маҳсулот етиштиришга эътибор қаратилмоқда. 

Бугунги кунда маҳаллада 100 дан ортиқ иссиқхона мавжуд бўлса, уларнинг 50 таси жорий йилда ташкил этилган. Клара Облоқулова мана икки йилдирки хонадонидаги томорқада иссиқхона қуриб фойдаланиб келмоқда. Турмуш ўртоғи Мақсуд Облоқулов кўмагида ҳар мавсумда мўмайгина даромадга ҳам эга бўлмоқда.

– Жорий йилда иссиқхонамизга дастлаб картошка эккан эдик. Картошкамиз етилиб, йиғиштириб олмоқдамиз. Ердан унумли фойдаланиш мақсадида картошка кўкариб чиққач, эгатларга помидор ҳам эккан эдик. Буни биринчи бор синов тариқасида қилдик. Ҳозир помидоримиз гулга кириб, нишона кўрсатган. Помидорга зарар етмаслиги учун картошка поясини ип билан боғлаб парваришламоқдамиз. Картошкани йиғиштириб олганимиздан кейин тез кунларда помидоримиз ҳам пишиб қолади. Ҳосилимизни уйимизда келиб олиб кетишади. Бозорга чиқариб, вақт кетказиб юрмаймиз. Шунингдек, қўшимча даромад сифатида 4-5 та қорамол ҳам боқамиз. Етилгач, сўйиб гўштини сотамиз. Ўрнига яна бошқасини сотиб олиб, парваришлаймиз. Хуллас, томорқадан оладиган даромадимиз ўзимизга етарли, – дейди К.Облоқулова.

Суннат Рамазонов 30 ёшда. У ота-боболари шуғулланган касбни давом эттирмоқда. Бобоси Рамазон бобо ўтган асрнинг 70 йилларидан буён асаларичилик билан шуғулланиб келади. Отаси Ҳамро Ғаниев ҳам асаларичилик билан оила тебратади.

– Ота-боболарим шуғулланган касбни улуғлаб, бировдан кам бўлганим йўқ, – дейди С.Рамазонов. – 50 қутидан зиёд асалари уяси бор. Белгиланган тартиб-тамойилларга асосан уларни парваришлаймиз. Мавсумга қараб, турли жойларга олиб борамиз. Етиштирган асал маҳсулотини уйдан туриб сотамиз. Ўзимизнинг мижозларимиз бор. Келиб олиб кетишади. Асаларичиликдан ташқари иссиқхонамиз, қорамолларимиз бор. Даромадимиз ёмон эмас. Оилада 3 нафар фарзандмиз. Барчамиз уйли-жойли бўлганмиз. Меҳнат қилган киши кам бўлмайди.

Албатта, бугун томорқада меҳнат қилувчиларга барча шароитлар яратиб берилмоқда. Уларга имтиёзли кредитлар ажратилмоқда. Хуллас, юртимизда томорқа маданиятини янада юксалтириш орқали озиқ-овқат хавфсизлигини таъминлаш, аҳоли бандлиги ва даромадини оширишга алоҳида эътибор қаратилмоқда. 

А.Бўриев, ЎзА мухбири