Пойтахтимиздаги "Saxovat Sport Servis" спорт мажмуасида ўтаётган М–15 тоифасига мансуб халқаро теннис турнирининг жуфтлик финали ва яккалик баҳсларининг ярим финал учрашувлари бўлиб ўтди.

Яккалик беллашувларида Сергей Фомин япониялик Рента Токуда билан баҳс олиб борди. Кутилмаган тарзда Фомин рақибига имкониятни бой бериб қўйди. Бошқа бир ярим финал учрашувида эса ёш теннисчимиз Максим Шин италиялик Лорензо Лоруссони мағлуб этиб, финал йўлланмасини қўлга киритди. Шу тариқа, бугун Максим Шин ва Рента Токуда турнир ғолиблиги учун майдонга тушади.

Яккалик баҳсларида муваффақиятсизликка учраган Сергей Фомин бор эътиборини жуфтлик финалига қаратди. У украиналик ҳамтандеми Владислав Орлов билан бирга ҳиндистонлик Исъҳоқ Иқбол ва Нитин Кумар Синҳ жуфтлигини 6:2, 6:4 ҳисобида ишончли тарзда мағлубиятга учратиб, бош совринни қўлга киритди.

Жавоҳир Тошхўжаев, ЎзА