Тайланд ҳукумати Камбоджа билан чегарада беш кун давом этган қуролли можародан кўрилган зарарни ҳисоблаб чиқмоқда. Дастлабки ҳисоб-китобларга қараганда, 5 кунлик зиддиятдан тахминан 308 миллион АҚШ доллар зарар кўрилган.

Мамлакат Бош вазири ўринбосари ва молия вазири Пҳичаи Чоонхавачиранинг сўзларига кўра, етказилган зарарнинг якуний миқдори анча юқори бўлиши мумкин, шу сабабли ҳукумат низо оқибатларини бартараф этиш учун дастлаб 770 миллион АҚШ доллари ажратишни режалаштирмоқда.

Маълумки, душанба куни Малайзия Бош вазири Анвар Иброҳим Куала-Лумпурда бўлиб ўтган музокаралардан сўнг Тайланд ва Камбоджа ўт очишни тўхтатишга келишиб олганини ва бу келишув маҳаллий вақт билан ярим тунда кучга кирганини айтганди. Шунингдек, муҳокамаларда чегара бўйлаб қўшинларни жойлаштиришдан воз кечиш бўйича келишувга эришилган. 

С.Раҳимов, ЎзА