Қашқадарё вилоятининг Китоб туманида жойлашган Самарқанд вилоятига ўтувчи “Тахтақорача” довонида янги туризм инфратузилмалари қурилаётгани ҳақида хабар бергандик. Куни кеча улардан бири 4 қаватли шинам меҳмонхона ишга туширилди.

Объектнинг тантанали очилишида вилоят ҳокими М.Азимов, Президент маслаҳатчиси ўринбосари Улуғбек Муҳаммадиев ва бошқалар иштирок этди. 

Таъкидлаш лозимки, “Омад Сервис Қурилиш” МЧЖ томонидан амалга оширилган ушбу лойиҳа қиймати 3 миллион АҚШ долларини ташкил этиб, у ҳудуднинг туристик салоҳиятини янада оширишга хизмат қилади.

Лойиҳанинг биринчи босқичи доирасида 100 ўринли замонавий меҳмонхона ва 300 ўринли оилавий ресторан барпо этилди. Ушбу объектлар сайёҳлар ва маҳаллий аҳоли учун қулай дам олиш шароитларини яратиш мақсадида қурилган бўлиб, меҳмонларга юқори даражадаги хизмат кўрсатишга мўлжалланган. Шунингдек, лойиҳанинг иккинчи босқичида 20 та капсула уйлари ҳам олиб келиниши режалаштирилган. Бу ҳудудга ташриф буюрувчилар учун янада замонавий ва қулай турар жой имкониятларини яратади.

 

Китоб тумани ўзининг бетакрор табиати, тоза ҳавоси ва сўлим манзаралари билан ажралиб туради. Айниқса, “Тахтақорача” довони баҳор ва ёз фаслларида яшилликка бурканган тоғ ёнбағирлари, шовуллаган булоқлари ва кўзни қамаштирувчи манзаралари билан сайёҳларни ўзига ром этади. Ушбу ҳудуд  экотуризм ва сайёҳлик учун катта имкониятларга эга бўлиб, янги лойиҳанинг амалга оширилиши Китоб туманининг туристик қиёфасини очиб беради.

Мазкур лойиҳа туфайли нафақат маҳаллий аҳоли учун янги иш ўринлари яратилмоқда, балки ҳудудга чет эллик ва маҳаллий сайёҳларнинг жалб қилинишига ҳам катта ҳисса қўшилмоқда. Келгусида ушбу масканни янада ривожлантириш ва қўшимча туризм объектларини барпо этиш режалаштирилган бўлиб, бу Китоб туманини юртимизнинг энг диққатга сазовор сайёҳлик масканларидан бирига айлантиришга замин яратади.

Ўлмас Баротов, ЎзА мухбири