Гарвард ва Бейлор университети олимлари ўтказган тадқиқотга кўра, Z авлод (18–29 ёшдагилар) тарихдаги энг бахтсиз авлодга айланган. 22 та мамлакатдан 200 мингдан ортиқ респондентлар иштирок этган сўров натижаларида анъанавий “бахт эгри чизиғи” ўзгаргани аниқланган.

Авваллари одамлар ёшликда энг бахтли, ўрта ёшда нисбатан тушкун, кексаликда эса яна ҳаётдан мамнун бўлган. Эндиликда бу чизиқ текис тус олган — ёшлар қувонч ҳиссини эрта йўқотмоқда ва уни қайта тиклаш учун кўп вақт керак бўлмоқда.  

Z авлод вакиллари орасида хавотир, депрессия, молиявий муаммолар ва ҳаёт маъносининг йўқлиги кенг тарқалган. Кўпчилик ўзини ёлғиз, фойдасиз ва келажагига ишончсиз ҳис қилади.  

“Бу жуда ташвишли ҳолат. Биз ёшлар фаровонлигига етарлича сармоя киритаяпмизми?” — дейди тадқиқот муаллифларидан бири, Гарвард олими Тайлер Вандервил.  

Мутахассислар бу ҳолатни жамият босими, сиёсий беқарорлик ва салбий ахборот оқими билан боғлашмоқда. Агар бу тенденция давом этса, инсон ҳаётидаги “бахтли ёш даври” тушунчасини қайта кўриб чиқиш керак бўлади.  

<iframe width="560" height="315" src="https://www.youtube.com/embed/dqBl8VB7iDw?si=6CB1Oxpj5SazA5bh" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА