Ҳар йили юртимизда 1 апрель – Халқаро қушлар куни кенг нишонланади. Сана муносабати билан Навоий давлат университети, Ўзбекистон Экологик партияси Навоий вилоят Кенгаши ҳамда “Юксалиш” ҳаракати Навоий вилоят бўлими ҳамкорлигида экотадбир ташкил этилди.

[gallery-22612]

Унда сўзга чиққанлар қушларнинг табиатда тутган ўрни, уларни асраб-авайлаш борасида амалга оширилаётган ишлар ҳақида тўхталди. 

Таъкидланганидек, қушлар ўзларига хос экологик вазифаларни бажариб, табиат мувозанатини таъминлашда иштирок этади. Бугунги кунда юртимизда қушлар дунёсини сақлаш ва ҳимоя қилиш мақсадида миллий қўриқхоналар ҳамда табиатни муҳофаза қилиш ҳудудлари ташкил этилиб, бу ерда қушлар учун зарур бўлган табиий шароитлар сақланиб қолмоқда. 

Маълумотларга кўра, дунёда 10 мингдан ортиқ қуш тури мавжуд бўлиб, Ўзбекистонда уларнинг 500 дан ортиқ тури учрайди ва 51 турдаги қуш республика “Қизил китоби”га киритилган.  

Тадбир давомида талабалар томонидан ясалган қуш инлари ва чизилган расмлар намойиш этилди. Бу ижодий ишлар ёшлар ўртасида табиатни севиш, уни асраш ва қушларга ғамхўрлик қилишда алоҳида ўринга эга эканлиги билан аҳамиятлидир. 

Тадбир сўнггида намойиш этилган қуш инлари Навоий давлат университети боғидаги дарахтларга ўрнатилди.

А.Бўриев, ЎзA мухбири