Мамлакатимизда кичик ва ўрта бизнесни қўллаб-қувватлаш давлат сиёсатининг устувор йўналишларидан биридир. Шу боис тадбиркорликни ривожлантириш, уларни қўллаб-қувватлашга муҳим эътибор қаратилмоқда.
Президентимизнинг 2022 йил 27 июлда қабул қилинган "Тадбиркорлик субъектлари билан самарали мулоқот тизимини жорий этиш ва уларнинг ҳуқуқий ҳимоясини янада кучайтириш чора-тадбирлари тўғрисида”ги фармони билан “Тадбиркорлар виртуал офиси” –kb-business.gov.uz портали ташкил этилган. Бунинг натижасида рақамли технологиялар орқали тадбиркорлик субъектларининг муаммолари билан ишлаш тизими такомиллаштирилди, шунингдек, уларнинг ҳуқуқлари ва қонуний манфаатларини ҳимоя қилиш механизмлари янада кучайтирилди.
Виртуал офис орқали тадбиркорлардан келган мурожаатлар ижобий ечим топиб, уларга амалий кўмак кўрсатилмоқда.
Хусусан, Бизнес-омбудсман девонининг Фарғона вилояти шўъбасига виртуал офис орқали ўтган йил давомида 562 та мурожаат келиб тушган бўлиб, уларда 576 та масала кўтарилган.
– Мурожаатларда билдирилган масалаларнинг 175 таси қаноатлантирилган, 396 тасига тушунтириш берилган ва 5 таси рад этилган, – дейди Бизнес-омбудсман девони Фарғона вилоят шўбаси ходими Фарҳод Дадабоев. – Натижада 9 миллиард 640,8 миллион сўм дебитор қарздорлик қайтарилиши, 662 миллион сўм кредит маблағлари ажратилиши ва 98 миллион сўм қўшимча ҳисобланган солиқлар ҳисобдан чиқарилишига эришилган. Жорий йилнинг январ-март ойларида 119 та мурожаатда 125 та масалалар келиб тушди.Унинг 101 таси кўриб чиқилиб, 46 фоизи қаноатлантирилган, қолганига тушунтириш берилди.
Виртуал офис орқали тадбиркорлар мурожаатларини қатъий назоратга олиниши натижасида тадбиркорларнинг муаммоси ижобий ҳал этилишига эришилди.
Қўқон шаҳрида фаолият кўрсатувчи “Kokand City Production” МЧЖ давлат корхонасига етказиб берган маҳсулотлари учун 1 миллиард 480,7 миллион сўм ҳақини ололмаётгани юзасидан виртуал офисга мурожаат йўллаган. Мазкур мурожаат масъул вазирликка ижро учун юборилиб, маблағ тўлиқ ундириб берилиши таъминланди.
Тадбиркорлик – иқтисодиёт танячи. Демак уларни муаммоларини ҳал этиш муҳим вазифа. Бу борада виртуал офиснинг салмоғи ортиб бормоқда.
М.Сулаймонов, ЎзА