Қорақалпоғистон аҳолиси учун яратилаётган кенг имкониятлар асосида Хўжайли туманида ўз фаолиятини ривожлантираётган ҳунармандлар ҳамда фаол тадбиркорлар фаолияти билан яқиндан танишиш мақсадида Ўзбекистон Савдо-саноат палатаси Қорақалпоғистон Республикаси бошқармаси томонидан оммавий ахборот воситалари вакиллари иштирокида пресс-тур ташкил этилди.
Тадбир иштирокчилари дастлаб туманда фаолият юритаётган ҳунарманд Азамат Избергенов хонадонида бўлиб, унинг иш фаолияти билан яқиндан танишди. Азамат йигирма йилдан ортиқ вақтдан буён ёғочдан ҳунармандчилик буюмларини ясаш билан шуғулланади. Ҳунарманд томонидан тайёрланган бешик, аравача, болалар арғимчоғи ва бошқа буюмларга қизиқиш билдирган харидорлар сони ортиб бормоқда. У турмуш ўртоғи билан биргаликда республикада ташкил этилган бир қанча ҳунармандчилик бўйича кўргазма-ярмаркаларида иштирок этиб келмоқда.
[gallery-22607]
Шундан сўнг, оммавий ахборот воситалари вакиллари “Cake Boomer” бренди асосчиси, тадбиркор Маҳира Мамутованинг фаолияти ва корхонада яратилган имкониятлар билан яқиндан танишди. “Cake Bumer” оилавий корхонаси ўз фаолиятини 2007 йилдан бошлаган бўлиб, қандолат маҳсулотларини тайёрлаш билан шуғулланади.
Дастлаб, бир нафар ишчи билан ўз фаолиятини бошлаган ушбу корхонада бугунги кунда юздан ортиқ фуқаронинг доимий бандлиги таъминланган. Шундан 30 нафардан ортиғи миграциядан қайтган фуқаролар бўлса, 80 фоизини хотин-қизлар ташкил этади. Шунингдек, корхонанинг Нукус шаҳри ва Қўнғирот туманларида филиаллари ҳам мавжуд бўлиб, қандолат маҳсулотларини ишлаб чиқариш ва сифатли хизмат кўрсатиш билан шуғулланмоқда.
Тадбиркорга Президентимизнинг 2023 йил 8 августдаги “Қорақалпоғистон Республикасида тадбиркорларга қулай шароитлар яратишга оид қўшимча чора-тадбирлар тўғрисида”ги фармони асосида Хўжайли тумани марказидан инвестиция киритиш шарти билан тўғридан-тўғри ер майдони ажратиб берилди. Ушбу имтиёз натижасида “Cake Bumer” оилавий корхона фаолияти янада кенгайиб, келгусида қўшимча 50 нафардан зиёд ёш ва хотин-қизнинг доимий бандлиги таъминланиши режалаштирилган.
Пресс-тур давомида журналистлар туманда тадбиркорларга яратилган шароитлар ҳамда уларга берилаётган имкониятларнинг бевосита гувоҳи бўлди.
Довуд Абибуллаев, Мақсад Ҳабибуллаев (сурат), ЎзА