Швейцариянинг соат ишлаб чиқарувчи “Swatch” ширкати осиёлик эркакнинг бироз қисиқ кўзлари бурчагини юқорига ва орқага тортаётгани акс этган реклама эълон қилгач, оммавий норозиликка учради ва охир-оқибат узр сўраб чиқди.

“Swatch Essentials” тўплами суратлари Хитойда онлайн тарзда қораланди ва кўплаб изоҳлар орқали осиёликларнинг кўзига нисбатан ирқчиликка шамаъ қилувчи тақлидга йўл қўйилгани даъво қилинди.

Шанба куни ширкат “Weibo”даги расмий саҳифасида хитой ва инглиз тилларида эълон қилинган узр мактубида “сўнгги эътирозларга эътибор қаратгани” ва бутун дунё бўйлаб тегишли контентни ўчириб ташлаганини билдирди.

– Ноқулайликка олиб келиши мумкин бўлган тушунмовчилик учун чин дилдан узр сўраймиз, – дейилган баёнотда. – Компания “Инстаграм” орқали ҳам худди шундай мазмунда узр сўради.

“Swatch Group” ширкати “Reuters” агентлигининг қўшимча изоҳ-сўровига дарҳол жавоб бермади. Реклама билан боғлиқ танқид 2023 йил бошидан буён акцияси нархи икки баробардан кўпроқ тушган компания учун, айниқса ҳозир, АҚШга экспорт учун 39 фоиз бож белгиланган бир пайт, жиддий муваффақиятсизликдир. “Omega”, “Longines” ва “Tissot” соатлари ишлаб чиқарадиган бу жамоа асосан Хитой бозорига таянади: ўтган йил сотувнинг тахминан 27 фоизи Хитой, Гонконг ва Макаога тўғри келган.

М.Пирматова, ЎзА