Сингапурда сув полоси бўйича U20 ёш тоифасида ўтган Осиё чемпионатида бронза медалларига сазовор бўлган Ўзбекистон аёллар терма жамоаси ҳамда чемпионатда 5-ўриндан жой олган эркаклар терма жамоаси аъзолари Ислом Каримов номидаги Тошкент халқаро аэропортида тантанали кутиб олинди.

Кутиб олиш маросимида Ўзбекистон касаба уюшмалари федерацияси, мамлакат сузиш федерацияси, Олий спорт маҳорати мактаби масъуллари, мутахассислар, ота-оналар, кенг жамоатчилик вакиллари иштирок этди.

Осиё чемпионатида Хитой, Япония, Ҳонг Конг, Қозоғистон, Сингапур жамоалари билан кечган беллашувлар натижасига кўра, жаҳон чемпионатида қатнашиш ҳуқуқини қўлга киритган ҳамюртларимиз келгуси йил Японияда ўтадиган ёзги Осиё ўйинлари олдидан эътироф этилди.

Ушбу кўрсаткич яна уч йилдан кейин океан ортида ўтадиган "Лос-Анжелес-2028" Олимпиадасига тайёргарликнинг муҳим босқичи экани таъкидланди.

Эслатиб ўтамиз, Халқаро сузиш федерацияси томонидан сув полоси бўйича 20 ёшгача бўлган хотин-қизлар ўртасидаги жаҳон чемпионати жорий йилнинг 10-28 август кунлари Бразилиянинг Салвадор шаҳрида бўлиб ўтади.

Т.Рўзиев,

ЎзА