Бежизга бу азиз ва тансиқ неъматга “оби ҳаёт” дея таъриф берилмаган. Ҳозирда Бухоро вилояти Вобкент тумани аҳолисининг ҳам истеъмолга яроқли тоза ичимлик сувига бўлган талаб ва эҳтиёжи қондирилиб, маҳалла ва қишлоқларга сув тармоғи кириб бормоқда.

Сўнгги йилларда туманнинг Кўлодина, Қатаған, Бозоржойи, Чўрикалон, Латифсобунгар, Кўкдала, Работхоса каби маҳалла ва қишлоқларнинг ўнлаб оилалари ичимлик сув билан таъминланди. 

Айни кунда туманда жами 17 минг 660 та аҳоли истеъмолчилари, 375 та улгуржи истеъмолчилар ичимлик суви билан таъминланган. Туман аҳолисининг тоза ичимлик суви билан таъминлаш даражаси айни кунда 56 фоизни ташкил қилмоқда. 

Туманда аҳолининг тоза ичимлик сувига бўлган талаб-эҳтиёжини қондириш мақсадида 2023-2024 йиллар давомида умумий узунлиги 124,8 километр ичимлик сув қувурлари тортилди. Бу борада амалга оширилган ишлар натижасида ўтган йил якунига келиб жами 4 минг 890 та аҳоли хонадони ва 5 та улгуржи ташкилот шартнома асосида “оби ҳаёт” билан таъминланмоқда. Айни пайтда ҳудуддаги мавжуд 44 та маҳалла фуқаролар йиғинидан 19 тасида аҳолининг тоза ичимлик сувига бўлган  талаби қондирилаётгани ҳолда қолган қишлоқ ва кўчаларга ичимлик суви қувурини тортиш ишлари режалаштирилмоқда.

Таъминотчи сифатида ҳозирда “Бухоро сув таъминоти” АЖ Вобкент тумани филиали тасарруфидаги 7 та гидроиншоот – “Пахтакор”, “Хайрхуш”, “Поноб”, “Шакаркент”, “Дамхўжа”, “Қўнғирот” ва “Дуоба” сув иншоотлари орқали аҳоли хонадонларига тоза ичимлик суви етказилмоқда. 

Зариф Комилов, ЎзА мухбири