Исроил –Фаластин можароси охирига етмай туриб, Яқин шарқ ҳудида яна бир давлатнинг тинчлиги бузилди.
Эрон бош дипломати Аббос Арақчий Сурия Президенти Башар Асад билан учрашиш учун Дамашққа борди. Ушбу ташриф исёнчилар Халаб ва Идлибдаги ҳудудлар устидан назоратни қўлга олган пайтга тўғри келди.
Сурия армияси якшанба куни бу икки шаҳардаги қўзғолончиларни ортга қайтариш учун бир неча қарши ҳужум уюштирди. Давлат телевидениеси ҳукумат қўшини томонидан сўнгги уч кунда 1000 га яқин исёнчи ўлдирилганини эълон қилди. Бинобарин, бу маълумотга ҳеч қандай далил, тафсилот келтирилмаган.
“Оқ дубулғалилар” номи билан танилган мамлакат фуқаролик мудофааси гуруҳи Асад армияси қўшма қарши амалиётни Россия кўмагида бошлаганини айтди.
Маълумотга кўра, қирувчи самолётлар зарбаси натижасида 18 киши ҳалок бўлган, ўнлаб одам яраланган. 13 йиллик урушда Асадни қўллаб-қувватлаб келаётган РФ бу гал ҳам Сурияга “24 соат ичида ракета зарбалари орқали террорчилар тажовузини қайтариш”да ёрдам берди. Жами 320 жангари, 63 зирҳли машина йўқ қилингани айтиляпти.
Эрон ҳам узоқ давом этган фуқаролар урушида Асаднинг асосий сиёсий ва ҳарбий иттифоқчиси ҳисобланади. Ислом Республикаси ТИВ раҳбарининг пойтахтга ташрифи Теҳрон мазкур араб давлати ҳукуматини бундан буён ҳам қўллаб-қувватлашига яна бир далил экани кундек равшан.
Ўтган ҳафта Ҳаёт Таҳрир аш-Шом (ҲТШ) бошчилигидаги исёнчи гуруҳлар коалицияси Суриянинг энг йирик шаҳри – Алеппога кутилмаган ҳужум уюштирди. Мамлакат Қуролли кучлари вақтинча чекинишга мажбур бўлди, чунки жавоб зарбасини бериш учун қўшимча кучга эҳтиёж бор эди. Натижада ҲТШ Халабнинг катта қисмини эгаллаб олди ва ҳозир Хама шаҳрига ҳам кирганини даъво қилмоқда.
Исёнчилар қўмондони полковник Ҳасан Абдулғоний таъкидлашича, тўда шаҳарнинг шимоли-шарқидаги Шайх Нажжор, Ҳарбий академия, жануби-ғарбидаги дала артиллерия коллежини ҳам назоратга олган.
Тезкор ва кутилмаган ҳужум Президент Башар Асад учун ёқимсиз, албатта. Айни пайт давлат армияси ҳақида ҳар хил фикр урчимоқда. Энг қизиғи, Сурияда зўравонлик Асад иттифоқчилари – Эрон ва турли гуруҳлар ҳамда Россия ўз можаролари билан овора бўлган, Яқин Шарқда шундай ҳам сиёсий нуқтаи назардан ўта нотинч вазият ҳукм сураётган мураккаб бир пайтга тўғри келди.
Ваҳоланки, Исроил Ғазодаги ХАМАС ва Ливандаги Ҳизбуллоҳ гуруҳларига қарши фаол курашмоқда. Шу кунлардаги воқеалар минтақавий тарқоқликни янада кучайтириб, икки минтақавий кучни ҳам можарога жалб қилиши мумкин. Туркия ҳам ўз манфаатини ҳимоя қилиш учун Сурияга ёрдам бериши эҳтимоли кучли.
Мусулмон Зиё, ЎзА