Футбол бўйича Ўзбекистон Суперлигасининг 6-тур учрашувлари бугун, 18 апрель куни бошланади. Мазкур турнинг илк кунида “Қизилқум” – “Қўқон-1912” ва “Хоразм” – “Бунёдкор” клублари ўртасидаги ўйинлар ўтказилди.

Миллий чемпионатимизнинг ушбу туридан ўрин олган “Нефтчи” – “Пахтакор”, “Шўртан” – “Машъал”, “Бухоро” – “Насаф” жамоалари баҳси 19 апрель куни ташкил этилса, 20 апрель куни ОКМК – “Сўғдиёна”, “Андижон” – “Динамо” ва  “Сурхон” – “Навбаҳор” ўртасидаги учрашувларга гувоҳ бўламиз.

Ҳозирда бешинчи тур якунларига кўра, Суперлига жадвалида ОКМК 13 очко билан яққол пешқадамга айланган. “Насаф” ва “Бунёдкор” жамоалари эса 11 очко  жамғариб, кучли учликдан ўрин олган. “Нефтчи”, “Андижон” ва “Динамо” клублари мусобақада 9 очко жамғарган ҳолда кейинги ўринларда бормоқда.

“Навбаҳор” ўтган бешта ўйинда 8 очко тўплаб 7-поғонадан жой олди. “Қўқон-1912”, “Бухоро” ва “Хоразм” жамоалари 6 очко тўплаган ҳолда кучли ўнталик рўйхатни якунлаб берди. “Сўғдиёна” ва “Қизилқум” ҳисобида 4 очко мавжуд ҳамда улар 11-12-ўринда бормоқда. “Пахтакор”, “Сурхон”, “Машъал” 3 очко билан, “Шўртан” эса бор-йўғи 1 очкони қўлга киритиб, қуйи поғоналарга жойлашди.  

Дарвоқе, “Қизилқум” ва “Хоразм” клублари қолган жамоаларга нисбатан битта ўйин кам ўтказган.  

Жавоҳир Тошхўжаев, ЎзА