Ҳиндистоннинг Бхубанесвар шаҳрида стол тенниси бўйича ташкил этилган жамоавий йўналишдаги 28-Осиё чемпионатида Ўзбекистон эркаклар терма жамоаси жаҳон чемпионати йўлланмасини қўлга киритди.
Осиё қитъасининг 16 та миллий терма жамоалари иштирокида ўтган чемпионатда мамлакатимиз вакиллари 3-гуруҳда Сингапур ва Ўмон жамоалари билан жаҳон чемпионати йўлланмаси йўлидаги гуруҳ босқичида кураш олиб борди.
Ўз гуруҳида Ўмонни мағлуб этиб, Сингапурга кичик ҳисобда мағлуб бўлган Ўзбекистон эркаклар жамоаси кейинги босқичга чиқиш имкониятига эга чиқиши билан бирга 2026 йили Англиянинг Лондон шаҳрида ўтказилиши режалаштирилган жаҳон чемпионатида қатнашувчи жамоалар қаторидан жой эгаллади.
Қитъа чемпионатининг аёллар гуруҳида иштирок этган мамлакатимиз стол теннисчи қизлари гуруҳ босқичида Бангладеш жамоасини мағлуб этган бўлса, Хитой Тайпейи ва Макао терма жамоаларига имкониятни бой бериб қўйди ва жаҳон чемпионати йўлланмасидан бебаҳра қолди.
Эслатиб ўтамиз, стол тенниси бўйича жамоалар ўртасидаги жаҳон чемпионати 2026 йилнинг 28 апрель - 10 май кунлари бўлиб ўтади. Унда Европа ва Осиё қитъасининг 16 тадан, Африка ва Америка қитъасининг 8 тадан ҳамда Океания қитъасининг 4 тадан миллий терма жамоалари иштирок этади.
Т. Рўзиев, ЎзА