Қарши шаҳрида жойлашган 2-ихтисослашган мактабгача таълим ташкилотида болажонлар педагог – Нодира Усмонованинг меҳрли нигоҳи остида янги сўзларни ўрганади. Бу болалар оддий эмас – уларнинг ҳар бири нутқида нуқсон билан туғилган, айримлари эса болалигидан ногиронлик ҳолатида. Аммо бу деворлар орасида ногиронлик эмас, имкониятлар тилга олинади.

Касб эмас – ҳаёт тарзи

Нодира Усмонова – логопед, “Дўстлик” ордени соҳибаси, 30 йилдан ортиқ вақтини болаларнинг овозига, талаффузига, нутқига бағишлаган. У ҳар бир ҳарф, ҳар бир товуш ортида жажжи қалбларнинг дунё билан алоқа қилиш орзуси борлигини билади. Унинг ҳар иш куни эрталабки машғулотдан тортиб, кечки индивидуал терапияларгача давом этади. Ҳар бир болага алоҳида ёндашув, сабр, педагогик маҳорат ва энг муҳими – меҳр керак.

– Баъзан бир сўзни ўргатиш учун бир ой вақт кетади, - дейди қаҳрамонимиз. – Аммо ўша сўз машаққати болакайнинг кўзларида порлаган биргина қувонч сабаб унутилади.

Машаққат ортидаги жасорат

Логопеднинг иши кўпчилик ўйлагандек фақат талаффузни тўғрилаш эмас. Балки, неврологик муаммолар, психологик тўсиқлар, ижтимоий чекловлар билан курашиш касби ҳамдир.  Нодира опа ҳар бир тарбиячини ўқитиш жараёнида уларнинг оиласи билан ҳам ишлайди. У ота-оналарга фарзандларининг имкониятларини тушунтиради, умид беради.

[gallery-25475]

Мукофотлар эмас, натижалар муҳим

Дўстлик ордени – унинг меҳнатига берилган юксак баҳо. Аммо Нодира опа учун энг катта мукофот – боланинг “Она” деган сўзни илк бор айтган лаҳзаси. Бу лаҳза кўп йиллик меҳнат, кўз ёш ва сабрнинг мевасидир.

Келажак сари ишонч

Бугун Қаршидаги бу муассаса нафақат логопедик ёрдам маркази, балки умид ва ишонч маконига айланган. Нодира Усмонова каби мутахассислар туфайли жамиятда ногиронликка эмас, инсонийликка эътибор кучаймоқда.

<iframe width="640" height="420" src="https://www.youtube.com/embed/-O4C7ZKkWt0" title="So‘zga hayot baxsh etgan ayol" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жамшид НОРҚОБИЛОВ (сурат, видео), ЎзА