Соутхенд аэропортидаги самолёт ҳалокати тафсилоти эълон қилинди
Якшанба куни Лондондаги Соутхенд аэропортида самолёт ҳалокатга учрагани тўғрисида хабар берилган, аммо воқеа тафсилоти тўлиқ очиқланмаган эди.
Британия ОАВ маълум қилишича, фалокат оқибатида тўрт киши ҳаётдан кўз юмган.
BBC нашри полиция қурбонлар ҳақидаги маълумотни ҳамон расман тасдиқламаётганини ёзган.
Нидерландиянинг “Zeusch Aviation” компаниясига тегишли 12 метрли "Beech B200 Super King Air" самолёти Лелистад шаҳри аэропортига учиши керак эди.
Авиакомпания SUZ1 рейси билан боғлиқ бахтсиз ҳодиса юз берганини тасдиқлади ва жабрланганларга ҳамдардлик билдирди.
Воқеага оид видео лавҳада самолёт қулагандан сўнг йирик ёнғин чиққани акс этган. Интернетда тарқалган суратларда ҳам кучли аланга, қора тутун кўтарилган.
Соутхенд аэропорти маъмурияти фожиаси муносабати билан ҳаво йўли кейинги маълумотгача ёпиқ қолишини билдирди.