Бугун, 2 апрель куни Филиппиннинг Нували шаҳрида соҳил волейболи бўйича эркаклар ва аёллар жамоалари ўртасидаги “AVC BEACH TOUR” 2-очиқ халқаро турнири баҳслари бошланади.

Айтиш лозим, мазкур мусобақа эркаклар ва аёллар жамоалари учун Осиё ва Олимпия ўйинлари йўлидаги муҳим рейтинг очколарини тақдим этиши билан аҳамиятли саналади.

Аёллар баҳсида 20 та мамлакат вакиллари қаторида ҳамюртларимиз Зарнигор Асқарова/ Нозимахон Жамолова жуфтлиги ғолиблик учун кураш олиб борса, эркаклар мусобақасида 24 та жуфтлик қаторида терма жамоамиз аъзолари Дилшодбек Толибоев/Азамат Даулибоев ва Ғолибжон Мустафоев/Нодиржон Алексеев ўз омадларини синовдан ўтказади.

Кеча, 1 апрель куни халқаро турнир иштирокчилари учун кенгайтирилган йиғилиш бўлиб ўтди.

Йиғин давомида жамоаларга турнир тартиб-қоидаси, техник жиҳатлари тўғрисида ахборот берилди. Шундан сўнг, қуръа ташлаш маросими ташкил этилди.

Мазкур анжуман давомида Ўзбекистон волейбол федерацияси вакиллари Филиппин волейбол федерацияси бош котиби Доналдо Карингал билан учрашув ўтказди.

Мулоқот давомида ҳамкорликда ўқув-машғулот йиғинларини ташкил этиш, ўзаро тажриба алмашиш борасида келишувга эришилди. Келгусида дўстона муносабатларни янада мустаҳкамлаш учун ҳамкорлик меморандуми имзолаш масаласи муҳокама қилинди.

Халқаро турнир мусобақалари 5 апрелга қадар давом этади.

Т.Рўзиев,

ЎзА