Мамлакатимизда ёши улуғ инсонлар доим иззат ва эътиборда. Айниқса, Иккинчи жаҳон уруши қатнашчилари ва фахрийлари, фронт ортида меҳнат қилган ҳамюртларимизга алоҳида эҳтиром кўрсатилмоқда. Айни жиҳатлар миллий табиатимизнинг устувор томонларини ташкил этади.

Ўзбекистон Республикаси Президенти Шавкат Мирзиёевнинг яқинда қабул қилган “Иккинчи жаҳон урушида қозонилган ғалабанинг 80 йиллиги ҳамда Хотира ва қадрлаш кунига тайёргарлик кўриш ва муносиб нишонлаш тўғрисида”ги қарори, “Иккинчи жаҳон уруши қатнашчиларини рағбатлантириш тўғрисида”ги фармони, “Иккинчи жаҳон урушидаги ғалабанинг 80 йиллиги” эсдалик юбилей медалини таъсис этиш тўғрисидаги фармони бу борадаги фикримизнинг амалий исботидир.

Мазкур ҳужжатларнинг аҳамияти, мамлакатимизда ёши улуғ инсонларга кўрсатилаётган амалий эътибор ва ғамхўрлик ҳақида Ўзбекистон Қаҳрамони, “Нуроний” жамғармаси республика Бошқаруви раиси, сенатор Содиқжон Турдиев билан суҳбатлашдик.

– Содиқжон ака, мамлакатимизда уруш ва меҳнат фахрийлари, умуман, ёши улуғ ҳамюртларимизга кўрсатилаётган ғамхўрлик кўпроқ нималарда намоён бўлмоқда?

– Мамлакатимизда сўнгги саккиз йилда кекса авлод вакилларига кўрсатилаётган ғамхўрлик, эъзоз ва эътибор, уларнинг саломатлигини асраш, мароқли дам олишларини, саёҳатларга чиқишларини таъминлаш ва жамият ҳаётидаги фаоллигини ошириш йўлида олиб борилаётган тизимли ишлар туфайли нуронийлар чин маънода қадрланиб, ҳурмат-эҳтиромга сазовор бўлиб, шукроналик билан умргузаронлик қилишмоқда.

Президентимизнинг “Иккинчи жаҳон урушида қозонилган ғалабанинг 80 йиллиги ҳамда Хотира ва қадрлаш кунига тайёргарлик кўриш ва муносиб нишонлаш тўғрисида”ги қарори ҳамда “Иккинчи жаҳон уруши қатнашчиларини рағбатлантириш тўғрисида”ги фармони мамлакатимизда нуронийлар ва фахрийларни эъзозлаш ва ардоқлаш йўлидаги эзгу амалларни янги босқичга кўтарди, десам муболаға бўлмайди.

Президентимиз фармонига кўра, бу йил Иккинчи жаҳон уруши қатнашчиларига 10 минг АҚШ долларидан бир марталик пул мукофоти берилиши, шунингдек, Иккинчи жаҳон уруши қатнашчиларига тенглаштирилган шахсларнинг ҳар бири 25 миллион сўмдан, 1941-1945 йиллардаги уруш давридаги меҳнат фронти қатнашчиларининг ҳар бири эса 3 миллион сўмдан пул мукофотлари билан тақдирланиши Иккинчи жаҳон уруши қатнашчиларининг матонати, жасорати ва сабру бардошига кўрсатилган юксак эҳтиром намунаси бўлди.

Шунингдек, Президентимизнинг “Иккинчи жаҳон урушидаги ғалабанинг 80 йиллиги” эсдалик юбилей медалини таъсис этиш тўғрисида”ги фармонига кўра, “Иккинчи жаҳон урушидаги ғалабанинг 80 йиллиги” эсдалик юбилей медали таъсис этилганини фахрийларимиз жуда катта мамнуният билан кутиб олишди.

Шу ўринда Иккинчи жаҳон урушида жонбозлик кўрсатган, аммо бугун орамизда бўлмаган отахону онахонларнинг хотираларини абадийлаштириш йўлида амалга оширилаётган эзгу ишларни ҳам алоҳида эътироф этишимиз жоиз. Президент қарорига асосан, “Иккинчи жаҳон уруши хотираларда” деб номланувчи ижодий ишлар кўрик-танловлари ўтказилиши, “Ўчмас у кунлар шуҳрати” мавзусида фотолавҳалар кўргазмасининг ташкил этилиши, “Номингиз дилларда мангу яшайди” мавзусидаги жасорат тарихи дарслари ёш авлодни ёши улуғ фахрийларимиз жасоратлари билан таништириш уларни ватанпарварлик руҳида тарбиялашда ўзига хос катта ҳаёт мактаби бўлмоқда.

– Тинчлик учун курашган боболаримиз, дориламон кунларимиз учун заҳмат чеккан ота-оналаримизнинг шону шавкатли қаҳрамонликлари бизларни мудом шукроналик билан яшашга, ҳаётнинг, азиз неъматларнинг қадрига етишга ундайди. Бу борада Сизнинг фикрларингизни билмоқчи эдик.

– Дарҳақиқат, Иккинчи жаҳон урушида қозонилган шонли ғалабада ўзбек халқининг улкан матонати, жасорати ва сабру бардоши мужассам, десак муболаға қилмаган бўламиз. Бу урушда қанчадан қанча дилбандларини йўқотган халқимиз жуда катта матонат билан тарихий ғалабага ўз ҳиссасини қўшди. Шубҳасиз, бу урушда қаҳрамонларча қурбон бўлганлар, урушдан омон қайтиб, юрти ва халқига узоқ йиллар хизмат қилганлар, аммо бугун орамизда бўлмаган отахону онахонларнинг хотиралари қалбларимизда мангу яшайди.

Шу ўринда Президентимиз ташаббуси билан сўнгги саккиз йилда нуронийларнинг, айниқса, Иккинчи жаҳон уруши фахрийларининг ва фронт орти меҳнат фахрийларининг ижтимоий ҳимоясини кучайтириш, соғлиғини асраш ва умрини узайтириш учун зарур шароит яратиш давлат сиёсатининг устувор йўналишларидан бирига айланганини алоҳида таъкидлаб ўтишни истардим.

– Кексаларга ҳурмат кўрсатиш, уларни ардоқлаш борасида “Нуроний” жамғармаси томонидан қандай ишлар амалга оширилмоқда?

– Миллий ва умуминсоний қадриятларни ўзида мужассам этган “Ҳеч ким меҳр ва эътибордан четда қолмасин” шиори остида ўзгалар парваришига муҳтож бўлган ёлғиз кексалар муаммолари ҳал этилмоқда. Иккинчи жаҳон уруши фахрийларига ҳамда якка-ёлғиз нуронийларга кўрсатилаётган тиббий-ижтимоий ёрдам даражаси ва сифати кескин яхшиланди. Муҳтож кексалар, ногиронлиги бўлган кексалар сифатли ёрдамчи ва техник реабилитация воситалари билан таъминланди.

Ўзгалар парваришига муҳтож бўлган ёлғиз кексаларни ҳар йили бир маротаба санаторийларда бепул соғломлаштириш йўлга қўйилди. Уларнинг саломатлигини тиклаш учун имтиёзли йўлланмалар топширилмоқда, яшаш жойлари таъмирланиб, обод қилинмоқда. Камбағалликни қисқартириш ва бандлик, Иқтисодиёт ва молия ҳамда Соғлиқни сақлаш вазирликлари томонидан қабул қилинган қўшма қарор асосида шароити оғир ва кам таъминланган кексалар чуқурлаштирилган бепул тиббий кўрикдан ўтказилмоқда.

Илдизлари қадим қадриятларимизга туташган тарбия мезонларимизда ёши улуғ отахон ва онахонлар ҳамиша ёшларнинг тарбияси, маҳалла ва эл-юрт ободлигига масъул бўлиб келган. Шу маънода бугун маҳаллалар ободлиги, оилаларда аҳиллик ва тотувлик муҳитини асраш, ёшларни касб-ҳунарли, билимли, келгусида юртимизнинг етук шахслари бўлиб улғайишлари йўлида олиб борилаётган тарбиявий ишларни янада кучайтиришда олдимизда долзарб вазифалар турибди.

Айни кунларда Ўзбекистон фахрийларининг ижтимоий фаолиятини қўллаб-қувватлаш “Нуроний” жамғармаси республика Бошқаруви ва унинг ҳудудлардаги бўлимларида “Ватан равнақи, тинчлиги ва ҳимояси йўлидаги қаҳрамонлик унутилмайди!” шиори остида Иккинчи жаҳон урушида қозонилган ғалабанинг 80 йиллигини кенг нишонлашга қизғин тайёргарлик ишлари олиб борилмоқда.

Байрам тадбирлари доирасида “Иккинчи жаҳон уруши: илмий тадқиқотлар ва тарихий маълумотлар” мавзусида халқаро илмий-амалий конференция ўтказилиши Иккинчи жаҳон уруши жангларида мардлик ва жасорат, фронт ортида матонат ҳамда инсонпарварлик намуналарини кўрсатган кўп миллатли Ўзбекистон халқининг Иккинчи жаҳон урушида эришилган ғалабага қўшган муносиб ҳиссасини яна бир бор мамлакатимизда ҳамда жаҳон илмий жамоатчилиги ўртасида кенг оммалаштиришга хизмат қилиши шубҳасиз. Мамлакатимизнинг барча умумтаълим ва “Темурбеклар мактаблари”да ўқувчи ёшлар ўртасида ҳарбийлаштирилган эстафета, ўқ отиш, камондан отиш, тўсиқлардан ўтиш ҳамда бошқа жамоавий ва якка кураш спорт турлари бўйича ҳарбий-ватанпарварлик спорт мусобақаларининг ташкил этилиши ёшларимизда ҳарбий ватанпарварликни кучайтиради.

Жорий йилнинг 1 февраль ҳолатига кўра, мамлакатимизда 88 нафар Иккинчи жаҳон уруши фахрийлари, 4059 нафар фронт орти меҳнат фахрийлари умргузаронлик қилишмоқда. Уларнинг ҳар бирига алоҳида эҳтиром кўрсатиш, машаққатли йиллар заҳматларидан омон чиққан бу табаррук инсонларнинг кўнглини кўтариш, уларни эъзозлаш ва ардоқлаш ҳар биримизнинг бурчимиздир. Давлатимиз томонидан кўрсатилаётган юксак ҳурмат-иззат туфайли Иккинчи жаҳон урушидан омон қайтган, эл-юртимиз равнақи йўлида узоқ йиллар хизмат қилган, бугун кўкси орден-медалларга тўлиб, давраларимиз тўрини безаб турган фахрийларимизнинг умрига умр қўшилиб, 100 ёшлар билан юзлашиб, ҳатто юз ёш довонидан ошиб, шукроналик билан дуолар қилиб яшамоқдалар. Бугун ҳар бири тирик афсоналарга айланган бу табаррук отахон ва онахонларнинг қаҳрамонлик ҳикоялари “Уч авлод учрашуви” маърифий тадбирларида ёшлар учун чин маънода ибрат мактаби бўлмоқда.

ЎзА мухбири Назокат Усмонова суҳбатлашди.