Ўзбекистон Халқ демократик партияси Қорақалпоғистон Республикаси Кенгаши томонидан партия “Ёшлар қаноти” аъзолари, олий ўқув юртларининг талаба ёшлари ўртасида “Сиёсатдаги ёшлар” интеллектуал турнири ўтказилди.

Турнирни ўтказишдан асосий мақсад, ёшларнинг сиёсий билим ва кўникмаларини ошириш, уларнинг сиёсий жараёнларда фаол иштирок этишини таъминлаш, ёшларнинг сиёсий-ҳуқуқий билимларини аниқлаш ва уларни қўллаб-қувватлаш, Ўзбекистон Халқ демократик партиясининг Сайловолди дастурида белгиланган вазифаларни амалиётга татбиқ этишда партия сафидаги ёшларнинг салоҳиятидан фойдаланиш, юксак сиёсий билим ва ташкилотчилик қобилиятига эга бўлган ёшларни аниқлаш, истеъдод ва қобилиятларини рўёбга чиқаришдан иборат.

Интеллектуал турнир иштирокчилари “Тезкор савол-жавоб” ва “Сиёсий тезкор жавоб” шартларида ўз билимларини синовдан ўтказди.

Қизғин беллашувда ўтган турнир якунида “KarОne” жамоаси биринчи, “Universal” жамоаси иккинчи, “Massaget” жамоаси учинчи ўринларни эгаллади.

Ғолиблар партиянинг Қорақалпоғистон Республикаси Кенгаши томонидан тайёрланган диплом ва қимматбаҳо совғалар билан тақдирланди.

Довуд АБИБУЛЛАЕВ,

ЎзА мухбири