Наманганда бир ҳафта давомида қизғин баҳслар остида кечган велотрек бўйича “Silk-Road Namangan-II” (“Ипак йўли Наманган”) халқаро турнири ўз ниҳоясига етиб, ғолиб ва совриндор спортчилар аниқланди.

Давлатобод туманида жойлашган “Велотрек” мажмуасида Президентимизнинг 2021 йил 24 сентябрдаги “Велоспортни ривожлантиришга доир комплекс чора-тадбирлар тўғрисида”ги қарори ижроси доирасида илк бор ташкил этилган халқаро даражадаги турнирда мамлакатимиз спортчиларидан ташқари, Қозоғистон, Россия Федерацияси, Тожикистон, Туркманистон, Қувайт, Эрон, Буюк Британия, Гонконг давлатларидан юзга яқин спортчилар трекнинг гуруҳ пойгаси, жамоавий пойга, жамоавий спринт, скретч, темпо, омниум, медисон, кейрин йўналишларида турли масофаларда куч синашди.

Халқаро пойгалар иштирокчилар учун “Париж –2024” ёзги Олимпия ўйинлари йўлланмаси учун рейтинг очколарини қўлга киритиш имконини берди. Айни шу боисдан ҳам нуфузли мусобақанинг ҳар бир ўйинида спортчилар бор маҳоратини ишга солди. Халқаро турнирнинг скретч пойгасида қозоғистонлик Руслан Элюбаев ва Беларусь вакили Каролина Бирук маррага биринчи бўлиб етиб келди. Чиқиб кетиш пойгасида Рамиз Динмуҳаммедов (Қозоғистон) ва ҳамюртимиз Маргарита Мисюринага тенг келадиган рақобатчи топилгани йўқ.

Медисон пойгасида Денис Мазур, Роман Тишко (Беларусь) ҳамда терма жамоамиз етакчилари Ольга Забелинская, Маргарита Мисюрина ғолибликни қўлга киритди. Кейрин пойгасида эса Гонконг спортчилари Чеук Хеи То ва Йиу Чо Енг “финиш” чизиғини барчадан олдин забт этишди.

Халқаро мусобақанинг ғолиб ва совриндор спортчилари Ўзбекистон Велосипед спорти федерацияси, Ёшлар сиёсати ва спорт вазирлиги, Наманган вилояти ҳокимлиги томонидан муносиб равишда тақдирланди.

Оқилхон Дадабоев, ЎзА